شاوخوا پنځه میاشتې وړاندې د قطر په دوحه کې د افغان حکومت او طالبانو ترمنځ د سولې مخامخ خبرې پیل شوې؛ خو تر دې دمه دا خبرې د افغانانو لپاره د منلو وړ پایله نه لري. د دې وضعیت په دوام د ولسي جرګې غړيو د يادې جرګې د رییس میر رحمان رحماني په مشرۍ یو کمیسیون جوړ کړ.
د ياد کميسيون مشر میررحمان رحماني وايي، د افغانستان د سولې خبرې د ناڅرګندو لاملونو له کبله ځنډول شوې دي او له دې وروسته به د ولسي جرګې غړي د سولې اړوند ټولو مسلو څخه خبر وي او په دې پروسه کې به مخامخ دخیل وي.
رحماني وايي، حکومت او طالبان یو بل په دې تورنوي چې د سولې پروسه له ځنډ سره مخوي. نوموړي وویل، حکومت او طالبانو واک ته رسېدو لپاره د خلکو غوښتنې له پامه غورځولي دي.
د ولسي جرګې رییس زياته کړه، د ولسي جرګې د سولې کمیسيون هڅه کوي چې د هراړخيزې طرحې په جوړولو سره سولې ته ورسېږي او اوسنۍ کړکېچ پای ته ورسوي.
