د عامې روغتیا وزارت ۳ کارکوونکي د ۸۰ زره ډالرو بډو اخیستو په تور په بند محکوم شول. لويې څارنوالۍ د يوې خبرپاڼې په خپرولو سره ويلي، په یاو ۳ کسانو کې د مرکزي سټاک امریت سرپرست غلام سخي نظر او د مرکزي سټاک د راپورونو د رسید مدیر غلام مصطفی پر پنځو پنځو کلونو او د فني امریت معتمد احمد فواد پر ۳ کالو تنفیذي بند محکوم شوي دي.
دغه حکم د اداري فساد د لویو جرمونو پر وړاندې د مبارزې عدلي او قضایي مرکز په یوه علني محکمه صادر شوی دی.
خبرپاڼه کې راغلي، دغې محکمې دغه درې کسان حکومت ته د ۸۰ زره امریکايي ډالرو پر ورکړې هم محکوم کړي دي.
لويه څارنوالي زياتوي، همداراز د دغې قضايي ناستې پلاوي د تشریح د پلاوي غړي اجمل عسکرزاده، د معاینې د مدیر محمود نوابي او د مرکزي سټاک د معاینې پلاوي فضل شاه قریشي د خوشې کولو حکم صادر کړ.
