د میدانوردګ د کرنې، اوبولګولو او مالدارۍ ریاست چارواکي وایي، د دغه ولایت د کرنې ریاست په همغږۍ په جلرېز، حصهاول بهسود او مرکزي بهسود ولسوالیو کې پر ۳۳۰۰ بېوزله او اړمنو کورنیو ۲۰میلیونه افغانۍ ووېشل شوې.
د یاد ولایت د کرنې، اوبو لګولو او مالدارۍ رییس مولوی عبد الجبار خالد سلاموطندار ته وايي چې د ملګروملتونو د بشري مرستو د همغږۍ دفتر (UN-OCHA) له لوري د دغه ولایت په درې ولسوالیو کې له شاوخوا ۳۳۰۰ بېوزله او اړو کورنیو نغدي مرسته وشوه.
د سلاموطندار پښتو فېسبوکپاڼه وڅارئ
خالد زیاته کړه، هرې بېوزله او سروې شوې کورنۍ سره ۱۱۲ ډالره مرسته شوې. د نوموړي په وینا، هڅه کوي چې ورته مرستې د یاد ولایت په پاتې ولسوالیو کې هم پر بېوزله او اړو کورنیو ووېشل شي.
په ورته مهال بېوزله کورنۍ هم خوښې دي چې د کرنې، اوبولګولو او مالدارۍ ریاست په همغږۍ د ملګروملتونو د بشري مرستو د همغږۍ دفتر (UN-OCHA) له لوري ورسره نغدي مرسته وشوه.
دوي غوښتنه کوي چې ورته مرستې دې د میدانوردګ په لروپرتو ولسوالیو کې هم پر بېوزله او اړو کورنیو ووېشل شي.