د مالیې وزارت سرپرست محمد خالد پاینده نن کابل کې یوه خبري غونډه کې د ۱۴۰۰مالي کال د بودیجې سند تصویب کې د ځنډ له کبله د ناوړه پایلو په اړه خبرداری ورکړ او ويې ويل، که ولسي جرګه بودیجه تصویب نه کړي، هېواد کې به د بېوزلۍ کچه لوړه شي او اقتصادي وده به زیان وویني.
په ورته وخت کې د مالیې وزارت مالي مرستيال عبدالحبیب ځدراڼ ټینګار کوي، که چېرې د ولسي جرګې له خوا د ۱۴۰۰مالي کال د بودیجې تصویبول نور هم وځنډطږي، د اوبو مدیریت او نورو کرنیزو برخو کې د هغو پروژو عملي کول به چې تر شلو کلونو وروسته دغه بودیجه کې شامل شوي، له ننګونو سره مخ شي.
دې سره د مالیې وزارت سرپرست د ۱۴۰۰مالي کال د بودیجې درېیمه مسوده کې د اصلاحاتو له رامنځته کولو ډاډ ورکوي او وايي، دغه وزارت د ښوونکيو او نورو ټيټپوړو دولتي کارکوونکيو د معاشونو زیاتولو ته چې د ولسي جرګې غوښتنه هم ده، ژمن دی.
دغه څرګندونې داسې حال کې مطرح کېږي چې د ولسي جرګې رييس میر رحمان رحماني تېره ورځ د دغې جرګې عمومي غونډه کې وویل، د ۱۴۰۰مالي کال د بودیجې درېیمه مسوده د ولسي جرګې ټولو کمیسیونونو ته استول شوې او پرې له بحث وروسته به نظرونه په لیکلي ډول د بودیجې کمیسیون ته وړاندې شي.
د ۱۴۰۰مالي کال د بودیجې سند دوه ځلې د ولسي جرګې غړو له لوري د نامتوازنوالي له کبله رد شوی، که څه هم د ماليې وزارت وايي، د دغې بودیجې درېیمه مسوده کې تعدیلات راغلي؛ خو د ولسي جرګې یو شمېر غړي اوس هم وايي، دغې مسودې کې د هغوی اکثریت وړاندیزونو ته پام نه دی شوی.
