د کورنیو چارو وزارت وايي، په وروستیو دوو اوونیو کې د طالبانو په ۶۵۰ یرغلیزو بریدونو کې ۲۱۰ ملکیانو ته مرګژوبله اوښتې ده.
د دغه وزارت ویاند طارق ارین وايي، طالبانو په یاده موده کې ۸۹ کړۍ ماینونه ايښي او چاودنه یې ورکړې ده.
د کورنیو چارو وزارت د معلوماتو له مخې، امنیتي ځواکونو د طالب وسلهوالو د بریدونو په ځواب کې یادې ډلې ته درنه مرګژوبله اړولې ده.
طالبانو تر اوسه د دغې ادعا په اړه غبرګون نه دی ښودلی.
طالب ډلې تل د کورنیو چارو وزارت اوونیز راپورونه رد کړي دي.
د طالبانو یرغلیز بریدونه او د ملکیانو مرګژوبله داسې مهال ډېره شوې چې د دولت او طالب ډلې مرکچیان له تېرو شل ورځو راهیسې په دوحه کې د سولې پر خبرو بوخت دي.