په نیمروز کې یوه باوري حکومتي سرچینه وايي، په دغه ولایت کې د ملي اردو پر یوې پوستې د طالبانو برید کې ۲۳ سرتېري وژل شوي دي.
دغه سرچینه چې نه غواړي نوم یې یاد شي، سلاموطندار ته ویلي چې یاده پېښه بېګاه لس بجې د نیمروز ولایت د لارام-خاشرود پر لویې لارې د دهمزنګ سیمه کې شوې ده.
د سرچینې په وینا، په برید کې د ملي اردو ۲۳ سرتېري وژل شوي او ۳ نور طالبانو له ځانه سره بیولي دي.
سرچینه وايي چې طالبانو د یاد نظامي مرکز ټول تجهیزات او امکانات له ځانه سره وړي او پر شاوخوا سیمو کې یې ماینونه اېښي دي.
دغه حکومتي سرچینه وايي، د ملي اردو سرتېري تر اوسه نه دي توانېدلي چې د قربانیانو جسدونه له سیمې را وباسي.
سرچینه زیاتوي، طالبانو په وروستیو څو میاشتو کې څو ځله پر یاد مرکز برید کړی و او بالاخره یې بېګاه نیولې ده.
یاده سرچینه د نیمروز د ملي اردو پر چارواکو او والي تور پورې کوي چې د جګړې په مدیریت کې پاتې راغلي او پر وخت یې یاد مرکز ته مرستندویه ځواکونه نه دي استولي.
هڅه مو وکړه چې په دې اړه د ملي اردو د مسوولانو نظر واخلو، خو بریالي نه شو.
خو طالبانو د یوه ویډيويي پیغام په خپرولو سره ادعا کړې چې په یاد برید کې د ملي اردو ۲۷ سرتېري وژلي او ۵ نور یې نیولي دي.