قندهار معارف ریاستی مسووللری نینگ ایتیش‌لریچه، ایکی کون آلدین میوند امنیه قومندانلیگی نینگ بناسی برابریده بمب جایلشتیریلگن موتر پارتله‌شی باعث، ایکی مکتب و معارف آمرلیگی نینگ بناسی هم تخریب بولگن.
اوشبو پارتلش ایکی کون آلدین (دوشنبه ۱۹- عقرب) میوند تومنیده یوزبیرگن و اوشبو واقعه‌ده ۴ کیشی هلاک و شونینگدیک حربیلر و تینچ‌اهالی شامل باشقه ۴۰ کیشی یره‌لنگن.
قندهار معارف ریاستی نینگ مطبوعات دفتری مسولی نظر محمد صمیمی گه کوره، مذکور پارتلش نتیجه‌سیده قومندانلیک بناسی نینگ یقیین‌لیگیده‌گی ملالی میوندی و غازی ایوب خان مکتب‌لری و شونینگدیک معارف آمرلیگی نینگ بناسی ویران بولگن. اونینگ ایتیشیچه، اوشبو پارتلش ده معارف ایشلاوچی‌لری و اوقوچی‌لرگه زیان ییتمه‌گن.
جناب صمیمی گه کوره، میوند تومنیده یوزبیرگن پارتلش نینگ ضررلری نی تیکشیریش اوچون مذکور تومن ده هیأت یوباریلگن.
میوند تومنی بوییچه ۱۸ مکتب فعالیت قیله‌دی و اوشبو مکتب‌لرده ایرکک و قیز اوقوچی‌لر شامل ۴۳۰۰ اوقوچی تعلیم کوره‌دی.
انه‌شوحالده، قندهار یشاوچیلری اوروش تامان‌لریدن عامه تأسیسات‌لرگه زیان یتکیزمسلیک‌لرینی سوره‌ب و عامه تأسیسات‌لری بوتون اهالی گه تیگیشلی بولگنی نی ایتگن.
مذکور کیشیلر، میوند تومنیده ایکی مکتب ویران بولگنی خصوصده خواطر بیلدیریب، مکتب‌لر، کوپریک‌لر و باشقه عامه تأسیسات‌لرنی بوزیش کیچیریلمه‌یدیگن بیر ایش دیگنلر.
بوندن آلدین هم قندهار معارف ریاستی نینگ مسووللری، اوشبو ولایتده‌گی ناتینچ‌لیکلر تعلیم و تربیه اوستیگه سلبی تاثیر تشله‌گنی نی ایتگن ایدیلر. اولر نینگ ایتیشیچه، اوروشلر جریانیده قندهار نینگ پنجوایی، ارغنداب، ژیری و میوند تومنلریده فعالیت قیله‌دیگن ۴۸ مکتب نینگ ایشیگی یاپیلیب و ۱۸۰۰ مینگ اوقوچی تعلیم کوریشدن محروم قالگن.
ایتیش لازم که میوند امنیه قوماندانلیگی اوستیگه اویوشتیریلگن هجوم‌ده مازدا تیپلی موتردن استفاده ایتیلگن. پارتلش شدتلی بولگنی باعث کوپینچه یشش اویلر و دکانلر زیان کورگن. لیکن حاضرگچه طالبان گروهی شامل هیچ بیر گروه حادثه مسئولیتی نی اوز بوینیگه آلمه‌گن.
قندهار – هرات قتناویولیده قرار تاپگن میوند تومنی، قندهار نینگ ناتینچ تومن‌لریدن بیری دیر. طالبان گروهی ایکی هفته دن بویان امنیتی کوچلر بیلن اوشبو تومنده آتیشه‌دیلر.
