سونگی ییل‌لرده مملکت اینقسه قندوز ولایتیدن کوپ‌قطار یاش‌لر شغل‌لنیش و تحصیل‌لرینی دوام بیریش مقصد ده نامنظم مهاجرلیک آرقه‌لی چیت‌ایللیک مملکت‌لرگه بارگنلر.
بیراق، مناسب ایش یوق‌لیگی و نامنظم شکلده مهاجرت قیلگنلر اوچون میزبان مملکت‌لرنینگ ناتوغری سیاست و برنامه‌سی سبب، اولر مقصدلریگه قول تاپمه‌ی و کوپینچه قیین‌چیلیک بیلن روپه‌ره بولگنلر.
نامنظم مهاجرلیک آرقه‌لی چیت‌ایللیک مملکت‌لرگه بارگن‌لردن بیری ذبیح‌الله کارگر دیر. او، ۳۱ یاشیده بولیب قندوز ولایتی نینگ قلعه‌زال تومنی یشاوچیسی دیر. جناب کارگر، قندوز بیلیم یورتی‌ده تحصیل قیلگن و بیر مدت قندوز ولایتیده سیلاو ایرکین کمیسیونی نینگ سیلاو آمری صفتیده فعالیت قیلگن.
ذبیح‌الله طالبان تامانیدن تهدید ایتیلگنیدن سونگ، نامنظم مهاجرلیک آرقه‌لی ترکیه‌گه بارگن. او، اوچ ییلدن بویان ترکیه نینگ «ازمیر» شهریده تیریک‌چیلیک قیله‌دی.
جناب کارگر، ترکیه گه بارگنیدن سونگ، مناسب ایش تاپیب و عین‌حالده تحصیلی‌نی دوام بیریش‌نی ایسته‌ریدی، بیراق اوشبو مملکتده یره‌تیلگن چیکلاولر و کرونا ویروسی نینگ کینگی‌گنی سبب، حاضرده هم ایسته‌گی گه قول تاپمه‌ی و کوپینچه قیین‌چیلیک بیلن روپه‌ره بولگن.
ذبیح‌الله نینگ ایتیشیچه، ترکیه مهاجرلیک قانون‌نی، نامنظم شکلده مهاجر بولگن‌لرگه قرشی قیین دیر و حس کد بولمه‌گن صورتده، هیچ‌کیم کته بازارلر، کسلخانه‌لر، رستورانت‌لر و متروبوس‌لرگه قول تاپه آلمه‌یدی.
جناب کارگرنینگ کوپه‌یتیریشیچه، کرونا ویروسی چیقگن پیتده کوپینچه قیین‌چیلیکلر بیلن روپه‌ره بولگن و قولایلیک بیلن ایش تاپیلمس ایدی و گاه‌گاهی ایش صاحبی حس کدی و یا-ده اعتبارلی قانونی مهاجرلیک کارت بولمه‌گن سبب، ایشچی‌لرنینگ بیر آی‌لیک حقوق‌لرینی بیرمس ایدی.
اونینگ ایتیشیچه، ایشچی‌لر ایش صاحب‌لریدن حقوق‌لرینی طلب قیلگن صورتده، اولر تامانیدن پولیس‌گه تاپشیریلیشی بیلن تهدید ایتیله‌دی و ایشچی‌لر قیته‌دن افغانستان‌گه یوباریلمه‌یش‌لری سبب، جیم توریش‌گه مجبور بوله‌دیلر.
عین‌حالده، قندوز ولایتی بوییچه خلق ارا مهاجرلیک یا-ده IOM دفتری نینگ ولایتی مسوولی شرف‌الدین شرف نینگ ایتیشیچه، اوتگن ییل‌لرده کوپ قطار مهاجرلر میزبان مملکت‌لرده ایش‌گه قول تاپمه‌گنی، پولیس تامانیدن اذیت ایتیلیش‌لری و کرونا ویروسی کوپه‌یگنی سبب، اوز مملکت‌لریگه قیتیب کیلگنلر.
اونینگ ایتیشیچه، کرونا ویروسی جریانیده اوشبو ولایتده قیتیب کیلگن ۱ مینگ دن آرتیق مهاجرگه مالی و غیرمالی یاردم بیرگن‌لر.
جناب شرف نینگ کوپه‌یتیریشیچه، خلق ارا مهاجرلیک تشکیلاتی هیچ‌قنده‌ی حجتی بولمه‌گن و نامنظم شکلده مهاجرلیک دن سونگ، قیتیب کیلگن کیشی‌لرنی پوشش آستیگه قرار بیریب و یاردم بیره‌دی.
شونینگدیک، قندوز ولایتی بوییچه مهاجرلیک و باش‌پناه ایزلاوچی‌لر ریاستی باشلیغی غلام‌سخی رسولی نینگ ایتیشیچه، کرونا ویروسی جریانیده ایران، ترکیه، پاکستان و عربستان مملکت‌لریگه بولگن کوپ‌قطار مهاجر اوشبو ولایت‌گه قیتیب کیلگنلر. اونینگ کوپه‌یتیریشیچه، قیتیب کیلگن مهاجرلر شاقه ایش‌لر بیلن شغل لنماقده ایکنلر، بیراق مذکور مملکت‌لرده قرطینه بولگنی سبب، اولر قیته‌دن اوز وطن‌لریگه قیتیب کیلگنلر.
قندوز ولایتی بوییچه مهاجرلیک و باش‌پناه ایزلاوچی‌لر ریاستی باشلیغی نینگ کوپه‌یتیریشیچه، چیت‌ایللیک مملکت‌لرده بولگن بوتون مهاجرلر اوروش یکونله‌نیشی‌نی کوتیب تورگنلر و اوروش یکونلنگن صورتده، اوز اولکه‌لریگه قیتیب کیلیش‌لری ممکن.
قندوز ولایتی بوییچه مهاجرلیک و باش‌پناه ایزلاوچی‌لر ریاستی تامانیدن بیریلگن معلوماتلرگه کوره، اوتگن بیر ییل جریانیده کرونا ویروسی کینگی‌گنی سبب، کمیده ۱۴ مینگ مهاجر اوشبو ولایت‌گه قیتیب کیلگن و بوجملهدن ۲ مینگ ته‌سی عایله‌لری بیلن بیرلیکده مهاجر بولگن ایکنلر.
قیتیب کیله‌دیگن مهاجرلر مملکت چیگره‌لریده خلق ارا مهاجرلیک تشکیلاتی IOM و مهاجرلیک بوییچه بیرلشگن ملت‌لر تشکیلاتی نینگ عالی کمیشنرلیگی (UNHCR) تامانیدن یاردم قولگه کیلتیرگن‌لر.
