سونگی ییل‌لرده افغانستانده ایش‌سیزلیک، کمبغللیک و ناتینچلیک کوپه‌یگنی سبب، کوپ‌قطار یاش‌لر ناقانونی شکلده، اروپا مملکت‌لری تامان یولگه چیقه‌دیلر.
اولردن بیری جمشید دیر. او، آرزوسیگه قول تاپیش مقصد ده نامنظم مهاجرلیک آرقه‌لی ایران‌گه باره‌دی، بیراق یولده کوپینچه قیینچیلیکلر بیلن روپه‌ره بولیب و بیر جای‌دن باشقه بیر جای‌گه انتقال بیریله‌دی.
جمشید نینگ سلام‌وطندارگه ایتیشیچه: «مملکت‌نی ترک قیلیش‌گه مجبور بولدیم و کوپینچه قیین‌چیلیکلردن سونگ، ایران‌گه باردم. نیچه مدت ایران‌گه ایدیم و او ییردن ترکیه تامان یولگه چیقدیم و بیر مدت ترکیه گه قالدیم. نتیجه‌ده بیرقطار دوست‌لریم بیلن ناقانونی شکلده یونان‌گه باردیک.»
جمشید اروپا ده مناسب امکانیت بیلن تیریک‌چیلیک قیلش اوچون قطار اقاربلریدن پول قرض آلگن.
اونینگ ایتیشیچه، یول مسیر ده کوپینچه قیین‌چیلیکلرنی تحمل قیلگن و حتا ییگولیک اوقات و ایچیم‌لی سوو تاپیلمه‌گن. جمشید کوپینچه قیین‌چیلیکلردن سونگ، اوزینی اروپا گه ییتیشتیرگن.
اونینگ ایتیشیچه: « ایش‌سیزلیک سبب، مهاجرلیککه قول اوردیم. ایش‌سیزلیک دن رنج ایلته‌ریدیم و ۱۲ کیشی نینگ آوقاتی‌نی تیارلش‌گه مسوول ایدیم.»
جمشید نینگ کوپه‌یتیریشیچه، ایش‌سیزلیک سبب، نامنظم مهاجرلیک آرقه‌لی یولگه چیقیش‌گه مجبور بولگن و یولده کوپینچه قیین‌چیلیکلرنی تحمل قیلیب اوزینی اروپا گه ییتیشتیرگن، لیکن قیته دن اوز مملکتی‌گه سورگون ایتیلگن.
شونینگدیک، نامنظم مهاجرلیک آرقه‌لی تشقی مملکت‌لرگه بارگن‌لردن باشقه بیری محمدهاشم دیر. او، نامنظم مهاجرلیک آرقه‌لی ایران‌گه بارگن. محمدهاشم، اوشبو مملکت‌گه باریش و قاچاقچی نینگ پولی‌نی تیارلش اوچون بوتون بارلیک‌لرینی ساتیب و حتا قمار اوریش‌گه یوز کیلتیرگن.
محمدهاشم نینگ ناقانونی مهاجرلیک خصوصیده ایتیشیچه: «قورال و پیچاق بیلن اوره‌دیلر و آدم‌لرنینگ تیناق‌لرینی چیقاره‌دیلر، آدم لرنینگ قولاقلرینی کیسه‌دیلر، پول کیلمه‌گن صورتده، بیر کرولا موتر نینگ تول‌بکسی‌گه ۵ کیشی‌نی جایلشتیره‌دیلر، بیر موترگه ۴۵ کیشی‌نی میندیره‌دیلر اولگن اوله‌دی قالگن قاله‌دی.»
محمدهاشم نینگ ایتیشیچه، یولده بولگن قیینچیلیکلر، قاچاقچی‌لرنینگ یمان برخوردلری و قاچاقچی‌لرنینگ کوپ پول طلب قیلیشی سبب، ایران‌گه باریش اوچون یوقاری تاغ‌لردن اوتیش‌گه مجبور بولگنلر.
اونینگ ایتیشیچه، بیرقطار یاش‌لر تاغ‌لردن ییقیلگنی سبب، جان بیرگنلر. «تاق اوستیگه ایدیک. باریب- کیله‌ریدیک. همراه‌لریمیزدن بیری ییقیلدی و دنیا دن اوتدی و اوستیگه نیچه تاش‌نی قایب دفن قیلدیک. یالغیز بو ایمس، قنچه جسدلر و قبرلر تاق نینگ اوستیگه بار ایدی. بونده‌ی قیینچیلیکلر بار و اونده‌ی بیر وضعیتده آدم نی ایناغه‌سی هم یاردم بیره آلمه‌یدی.»
محمدهاشم نینگ ایتیشیچه، دولت یاش‌لرگه ایش زمینه‌سینی یرهته آلمه‌گنی سبب، بوتون بو قیین‌چیلیکلرنی قبول قیلگن.
جوزجان ولایتی بوییچه مهاجرلیک و باش‌پناه ایزلاوچی‌لر ریاستی باشلیغی عبدالمالک رستمی نینگ ایتیشیچه، ینگی‌لیکده مملکت‌گه قیتیب کیلگن مهاجرلرنی اوشبو ریاست‌گه مراجعت قیلیش‌لری کیره‌ک. اونینگ ایتیشیچه، مهاجرلرنینگ نام‌لری قید ایتیلگنیدن سونگ، یاردم بیرووچی نهادلرنینگ یاردمی بیلن نقدی پول و ییگولیک ماده توزیع قیلیش‌لری ممکن.
اونینگ کوپه‌یتیریشیچه، ینگی‌لیکده مملکت‌گه قیتیب کیلگن مهاجرلر اوشبو نهادگه مراجعت قیلگن صورتده، اولرنینگ نام‌لرینی برنامه‌گه شامل قیله‌دیلر و گاه‌گاهی یاردم بیرووچی نهادلر تامانیدن مطرح ایتیلگن حالده، لیست و ارقام‌نی اولر بیلن شریک قیله‌دیلر و تیکشیریلگنیدن سونگ، اولرگه یاردم بیریله‌دی.
ییلده افغانستان یاش‌لریدن مینگ‌لرچه‌سی تینچ و مناسب فضا ده تیریک‌چیلیک قیلیش اوچون نامنظم مهاجرلیک آرقه‌لی اروپا مملکت‌لری تامان یولگه چیقه‌دی و بو یول ده حیات‌ده قالیش فقط شانس دیر.
کوپ قطار مواردلرده مملکت یاش‌لری ایش‌سیزلیک سبب، ناقانونی مهاجرلیککه قول اوره‌دیلر، بیراق اونینگ جسمی، مالی، روحی و روانی خطرلری خصوصیده معلومات‌لری یوق و بوتون پوللری هدر کیته‌دی.
جمشید و محمدهاشم مذکور یاش‌لردن ایکی ته‌سی دیر کیم، ناتینچلیک، کمبغللیک، ایش‌سیزلیک و آسوده بیر تیریک‌چیلیککه قول تاپیش اوچون ناقانونی مهاجرلیککه قول اورگنلر، بیراق، کوپینچه قیین‌چیلیکلرنی تحمل قیلگنلریدن سونگ، قیته‌دن اوز مملکتلریگه سورگون ایتیلگن‌لر.
