جمهوررئیس محمداشرف غنی نینگ ایتیشیچه، افغانستان سقوط باسقیچی ده قرار تاپمه‌گن و امنیتی و مدافعه کوچلرنینگ مملکت‌لریدن ایرکین شکلده مدافعه قیلیش گه کوچی ییته‌دی. جمهوررئیس‌لیک سرایی بیر خبرنامه ترقه‌تیب ایتیشیچه، جناب غنی اوتگن کون (پنج‌شنبه ۲۶- حمل) شام چاغی نظامی گنجوی خلق‌ارا مرکزی ییغینیده آنلاین شکلده بونده‌ی بیانات بیرگن.
خبرنامه اساسیده، جناب غنی نینگ مذکور ییغینده اورغولشیچه، مملکت امنیتی و مدافعه کوچلری نیچه ییل دن بویان عملیات‌لردن ۹۴ فایزی نی ایرکین شکلده عمل گه آشیره‌دی. ارگ نینگ خبرنامه‌سی اساسیده، جمهوررئیس غنی ینه بیر مرته آمریکا جمهورئیسی نینگ حربی‌لرینی افغانستان دن چیقاریشی توغریسیده آلگن سونگی قراری گه حرمت بیریب و بو پروسه عمل گه آشیریلیشی توغریسیده همکارلیک قیلیش گه ورغولگن.
ارگ نینگ خبرنامه‌سی اساسیده جناب غنی نینگ ایتیشیچه، آمریکا نینگ اوشبو قراری آمریکالیک حربیلر افغانستان دن چیقیشی یا-ده چیقمه‌یشی توغریسیده‌گی اهالی نینگ خواطرلرینی رفع بولیشی گه سبب بولگن.
جناب غنی نینگ کوپه‌یتیریشیچه، افغانستان حاضر بیر تاماندن تینچلیک پروسه‌سی و منطقوی اوله‌شیش و همکارلیکلر و باشقه بیر تاماندن ایسه منطقوی ترورچیلیک و جرمی ترماقلر برابریده قرار تاپگن.
شونینگدیک جمهوررئیس غنی نینگ ایتیشیچه، ترورچیلیک و جرمی ترماقلر فاجعه‌لرینی مدیریت قیلیش اوچون افغانستان گه همکارلیکلرنی دوام تاپیشی کیره‌ک. او بیاناتی نیگ بیر بولیمی ده ایتیشیچه، طالبان یا تینچلیک نی قبول قیلیش‌لری کیره‌ک یا-ده اولرگه قرشی کوره‌ش دوام تاپه‌دی. عین حالده، محمداشرف غنی تینچ و زوروانلیک دن و اوروش دن بوش بیر افغانستان نی منطقه مملکت‌لری، جمله‌دن پاکستان نینگ فایده‌سیگه دیگن.
جناب غنی افغانستان تینچلیگی خصوصیده تیارله‌گن یول نقشه‌سی توغریسیده ایتیشیچه، مذکور نقشه اوچ ستون، آتش‌بس، دواملی و عدالتلی تینچلیک تأمین ایتیلیشی و سیلاو یولگه قوییلیشی گه باغلیق دیر. اونینگ کوپه‌یتیریشیچه، تینچلیککه ایریشیش اوچون جمهورلیک ریاست دوری یکونلنمه‌سدن آلدین سیلاو یولگه قوییلیشی گه حاضر دیر.
بو بیانات ارایه ایتیلگن بیرحالده، جاری هفته چهارشنبه کونی آمریکا جمهوررئیسی جو بایدن، رسمی شکلده حربی‌لری نینگ افغانستان دن چیقیش تاریخی نی اعلام قیلدی. شونده‌ی بیرحالده، ناتو هم آمریکا حربی‌لری بیلن بیرگه بو تشکیلات حربی‌لری هم افغانستان نی ترک قیلیشی ممکن دیدی.
آمریکا جمهوررئیسی جو بایدن نینگ ایتیشیچه، آمریکالیک حربیلر نینگ افغانستان دن چیقیشی ۱۱- سپتمبر آیی گچه یکونلنه‌دی کیم بو تاریخ القاعده نینگ نیویورک برج‌لری اوستیگه اویوشتیرگن هجومی نینگ ۲۰ ییل‌لیگی گه ماس کیله‌دی.
او، حربیلر افغانستان نی بوتونلی ترک قیلگنیدن کیین هم آمریکا مذکور مملکت دن حمایت قیلیش گه دوام بیریشی نی تصدیقله‌گن، بیراق بو حمایت حربی ایمس دیر. «حربی شکلده افغانستان گه اَره‌لشمه‌یمیز، بیراق بیزلرنینگ دیپلماتیک فعالیت‌لریمیز و انسان‌دوستلیک یاردم‌لریمیز دوام تاپیشی ممکن.»
بایدن نینگ ایتیشیچه، بو چیقیش شاشیلینچ شکلده صورت تاپمه‌یدی و طالبان هجوم قیلگن صورتده، آمریکا اوزی و همکارلریدن مدافعه قیله‌دی.
