آمریکا جمهوررئیسی جوبایدن چهارشنبه کیچه ۲۵- حمل افغانستان توغریسیده بیانات بیریب ایتیشیچه، القاعده رهبری اسامه بن لادن نینگ هلاک ایتیلگنیدن ۱۰ ییل اوتماقده و آمریکا نینگ اوزون مدتلی اوروشی یکونله‌نیب و آمریکالیک حربیلر اوز مملکت‌لریگه قیتیش زمانی کیلگن.
اونینگ ایتیشیچه، آمریکالیک حربیلر نینگ افغانستان دن چیقیشی ۱۱- سپتمبر آیی گچه یکونلنه‌دی کیم بو تاریخ القاعده نینگ نیویورک برج‌لری اوستیگه اویوشتیرگن هجومی نینگ ۲۰ ییل‌لیگی گه ماس کیله‌دی.
او، حربیلر افغانستان نی بوتونلی ترک قیلگنیدن کیین هم آمریکا مذکور مملکت دن حمایت قیلیش گه دوام بیریشی نی تصدیقله‌گن، بیراق بو حمایت حربی ایمس دیر. «حربی شکلده افغانستان گه اَره‌لشمه‌یمیز، بیراق بیزلرنینگ دیپلماتیک فعالیت‌لریمیز و انسان‌دوستلیک یاردم‌لریمیز دوام تاپیشی ممکن.»
بایدن نینگ ایتیشیچه، بو چیقیش شاشیلینچ شکلده صورت تاپمه‌یدی و طالبان هجوم قیلگن صورتده، آمریکا اوزی و همکارلریدن مدافعه قیله‌دی.
اونینگ کوپه‌یتیریشیچه، طالبان بیلیش‌لری کیره‌ک کیم حربیلر افغانستان نی ترک قیلگندن کیین آمریکا یا-ده اونینگ بیرلشیک‌لریگه هجوم قیلگن صورتده، «بیزلر اوزیمیز و همکارلریمیزدن مدافعه قیله‌میز.»
شونینگدیک جناب بایدن نینگ ایتیشیچه، مملکتی افغانستان حربیلری، تینچلیک پروسه‌سی و عیاللر حقلریدن مدافعه قیلیش گه دوام بیریشی ممکن.
آمریکا تشقی ایشلر وزیری آنتونی بلینکن، ناتو باش کاتبی ینس استولتنبرگ بیلن اوتکزگن قوشمه خبری ییغینده ایتیشیچه، آمریکا حربیلری نینگ تینچ و اویغون بیر شکلده افغانستان دن چیقاریش اوچون کیلگوسی هفته‌لر و آیلر ناتوده‌گی بیرلشیک‌لری بیلن همکارلیک قیله‌دی. اونینگ ایتیشیچه: «بیزلر افغانستان نی ترک قیلگن بیرحالده هم، افغانستان و بو مملکت نینگ کیله‌جگی اوچون بیرگن وعده‌لریمیز اوز اورنیده قالیشی ممکن.»
رویترز خبرگزارلیگی نینگ گزارشی اساسیده، آمریکا مدافعه وزیری لویدن آستین، بروکسل گه قیلگن سفریده ایتیشیچه، آمریکا قوشمه ایالاتی افغانستان حربیلری دن مالی حمایت قیلیش گه دوام بیریش اوچون سعی و حرکت قیلیشی ممکن.
ناتو باش کاتبی ینس استولتنبرگ، آمریکا مدافعه و تشقی ایشلر وزیرلری بیلن اوتکزگن قوشمه خبری ییغینده ایتیشیچه، ناتو کوچلری نینگ افغانستان دن چیقیشی بیرینچی می آیی گه باشله‌نیشی توغریسیده، مذکور تشکیلات نینگ برچه بیرلشیک‌لری کیلیشگن.
اونینگ ایتیشیچه: «برچه بیرلشیک‌لریمیز بیله‌دیلر کیم بو آسان بیر قرار ایمس… ناتو کیله‌جکده مذکور مملکتدن حمایت قیلیش اوچون باشقه یوللرنی اَختریشی ممکن.»
شونده‌ی بیرحالده، جمهوررئیس محمداشرف غنی، جوبایدن بیلن تلفنی صحبت اوتکزگنیدن خبر بیرگن. جناب غنی بیر توییت آرقه‌لی ایتیشیچه، آمریکا نینگ سونگی قراری توغریسیده جمهوررئیس جوبایدن بیلن صحبت اوتکزگن. اونینگ یازیشیچه، افغانستان آمریکا نینگ بو قراری گه حرمت بیره‌دی.
جمهوررئیس غنی نینگ یازیشیچه: «بیزلر مشارکتی‌میز نی کیینگی باسقیچی تامان یول آلگن بیرحالده، جاری تینچلیک پروسه‌سی خصوصیده آمریکالیک و ناتو بیرلشیک‌لریمیز بیلن همکارلیککه دوام بیریشی‌میز ممکن.»
اونینگ کوپه‌یتیریشیچه: «افغانستان امنیتی و مدافعه کوچلری مملکت‌لری و اهالیسیدن مدافعه قیلیش اوچون بوتونلی کوچی ییته‌دی، بو ایش نی اولر هر دایم عمل گه آشیرگن و افغانستان اهالیسی هر دایم اولردن قدردانلیک قیلیشی ممکن.»
شونده‌ی بیرحالده، ملی مصالحه عالی کینگش باشلیغی عبدالله عبدالله نینگ ایتیشیچه، چیت‌ایللیک کوچلرنینگ افغانستان دن چیقیشی خلق‌ارا همکارلیک‌لرنینگ یکونله‌نیشی معناسیگه کیلمه‌یدی.
حاضر کمیده ۲۵۰۰ آمریکالیک حربی و ۱۰ مینگ دن آرتیق ناتو کوچلری کیسکین مأموریت چارچوبه‌سیده افغانستان ده موجود دیر.
