اسلام امیرلیگی تشقی ایشلر وزیرلیگی‌نینگ نشرات و اخبارات باشلیغی ضیااحمد تکل سلام‌وطندار بیلن صحبتده، تشقی ایشلر وزیری مولوی امیرخان متقی، رسمی اعضا صفتیده فرمت مسکو سکیزینچی ییغیلیشیده اشتراک ایتیشینی معلوم قیلدی.
افغانستان و منطقه مملکتلری اورته‌سیده‌گی سیاسی و اقتصادی همکارلیک، منطقه‌وی همکارلیک‌لرنی کینگه‌یتیریش همده کابل و اسلام‌آباد اورته‌سیده‌گی ماجرا، اوشبو ییغیلیش‌ده بحث گه آلینه‌دیگن موضوع‌لردن بولیشی ممکن.
سیاسی و خلق‌ارا مناسبت‌لر بوییچه ایریم بیلرمانلر، اوشبو ییغیلیش اوتکزیلیشینی اسلام امیرلیگی‌نینگ منطقه دولتلری بیلن همکارلیگینی مستحکم‌لش اوچون ینگی فرصت دیب ایتیشلریچه، منطقه‌وی ییغیلیش‌ده اسلام امیرلیگی هیئتی‌نینگ اشتراک ایتیشی، کابل و منطقه مملکتلری اورته‌سیده هماهنگ‌لیک و مذاکره‌لر گه زمینه یره‌ته‌دی.
خلق‌ارا مناسبت‌لر بوییچه بیلرمان مطیع‌الله آرین‌پور گه کوره، روسیه‌نینگ ایران، چین و مرکزی آسیا دولتلری بیلن یقین‌لیگی اوشبو مملکتلر همده اسلام امیرلیگی اورته‌سیده‌گی همکارلیک‌نی مستحکم‌لشگه زمینه یره‌تیشی ممکن. او شونده‌ی دییدی: «روسیه‌نینگ ایران، چین و مرکزی آسیا مملکتلریگه یقین‌لیگی بو دولتلرنینگ افغانستان بیلن خوفسیزلیک و اقتصادی علاقه‌لریده کوپراق ماسلشووچنلیک اوچون زمینه یره‌تیشی ممکن. روسیه شونینگدیک، اوز تأثیریدن فایده‌لنیب، بو مملکتلرنینگ موضوع‌لرینی موافقلشتیریشی و افغانستان‌نینگ ینه‌ده یکه‌لنیب قالیشیگه یول قویمسلیککه یاردم بیریشی ممکن.»
منطقه‌وی همکارلیک مسئله‌سیگه قوشیمچه، کابل و اسلام‌آباد اورته‌سیده‌گی ماجرا فرمت مسکو ییغیلیشیده بحث گه آلینیشی کوتیله‌یاتگن موضوع‌لردن حسابلنه‌دی. روسیه‌نینگ افغانستان اوچون مخصوص وکیلی ضمیر کابلوف، اسلام امیرلیگی و پاکستان اورته‌سیده‌گی قرمه-قرشی‌لیکلر اوشبو ییغیلیش‌ده بحث گه آلینیب و مسکو ایکی تامان‌نینگ طلب‌لرینی انابت گه آلگن حالده، واسطه‌چیلیک قیلیشگه تیار ایکنینی بیلدیرگن.
سیاسی مسئله‌لر بوییچه بیلرمان زلمی افغانیار، روسیه و پاکستان مناسبت‌لریگه اشاره قیلیب ایتیشیچه، مسکو قرمه-قرشی‌لیکلرنی مذاکره آرقه‌لی حل ایتیش اوچون اسلام‌آبادنی راضی قیلیشی ممکن. اونگه کوره: «روسیه‌نینگ پاکستان گه نسبتن سیزیلرلی تأثیری بار. باشقه تاماندن ایسه، مسکو ایکی تامان اورته‌سیده‌گی مذاکره‌لر گه میزبانلیک قیلیش‌نی ایسته‌یاتگنینی معلوم قیلگن. پاکستان‌لیکلر هم روسیه رسمی‌لری‌نینگ بیانات‌لریگه اعتبار قره‌ته‌دی. عمومی ملی منفعت‌لردن کیلیب چیقیب، پاکستان‌نی ضدیت‌لرنی افغانستان حدودی دخل‌سیزلیگینی بوزیش و بمباردمان قیلیش آرقه‌لی ایمس، بلکی مذاکره‌لر یولی بیلن حل قیلیش کیره‌ک‌لیگیگه ایشانتیریش ممکن.»
شو بیلن بیرگه، سیاسی مسئله‌لر بوییچه ینه بیر بیلرمان معین‌گل سمکنی‌نینگ ایتیشیچه، روسیه، چین و مرکزی آسیا دولتلری‌نینگ منطقه‌ده‌گی بی‌قرارلیک عاقبت‌لریدن خواطری کابل و اسلام‌آباد اورته‌سیده‌گی کیسکین‌لیکنی کمه‌یتیریشگه کوپراق اعتبار قره‌تیش اوچون زمینه یره‌تیشی ممکن.
آلدینراق، روسیه تشقی ایشلر وزیرلیگی هم، افغانستان باره‌سیده فرمت مسکو سکیزینچی ییغیلیشی، بیشینچی اکتوبر/۱۳ میزان مسکوده اوتکزیلیشینی بیلدیرگن ایدی.
بو ییغیلیش‌ده اسلام امیرلیگی، اوزبیکستان، قزاقستان، قرغیزستان، روسیه، تاجیکستان، پاکستان، چین، هندوستان و ایران‌نینگ ییریک وکیللری و عملدارلری اشتراک ایتیشی کوتیله‌دی.
