اوتگن کون دنیا نینگ ۲۰ سرمایه‌دار مملکتی نینگ رهبرلری، افغانستان گه انسان‌دوستلیک یاردم بیریش اوچون، خاص مجازی ییغین یولگه قویدی.
مذکور ییغینده دنیا رهبرلریدن قطاری طالبان بیلن علاقه‌لر سقله‌نیشی اوستیگه تأکیدلب بیراق ایتیش‌لریچه، بو طالبان نینگ رسمیت گه تانیش معناسیگه کیلمه‌یدی.
اروپا بیرلیگی افغانستان گه بیر میلیارد یورو انسان‌دوستلیک یاردم بیریش توغریسیده سوز بیرگن، بیراق ایتیلیشیچه، مذکور یاردملر افغانستان قوشنی مملکت‌لری نینگ اختیاری گه قرار بیریله‌دی.
بیراق ایش بیلرمانلردن قطاری نینگ ایتیش‌لریچه، بو یاردملر قوشنی مملکتلر آرقه‌لی صورت تاپمه‌سی کیره‌ک، بلکیم افغانستان دولتی یا بیرلشگن ملتلر تشکیلاتی تامانیدن صورت تاپسین.
بیزلرنینگ فیسبوک صحیفه‌میزگه باش اورینگ!
ایش بیلرمانلردن بیری حمیدالله هوتک نینگ ایتیشیچه، اوتگن ۲۰ ییل ده مملکتلر تامانیدن غیردولتی تشکیلاتلر یا قوشنی مملکتلر آرقه‌لی افغانستان گه یاردم بیریلگنی، یخشی نتیجه بیرمه‌گن.
اونینگ اورغولشیچه، مذکور یاردملر افغانستان دولتی آرقه‌لی صورت تاپگن صورتده، احتیاجی بولگن کیشی‌لرگه ییتیشیشی ممکن.
ایش بیلرمانلردن باشقه بیری فضل‌الرحمان اوریا، اورپا بیرلیگی نینگ بیر میلیارد یورولیک یاردمی گه اشاره قیلیب ایتیشیچه، دنیا جماعه‌چیلیگی افغانستان نی اونوتمه‌گن. شونینگدیک جناب اوریا نینگ اورغولشیچه، بو یاردملر توغری بیر شکلده افغانستان یشاوچی‌لریگه ییتیشتیریلیشی کیره‌ک.
بیرلشگن ملتلر تشکیلاتی نینگ باش‌کاتبی، آنتونی گوترش بو ییغین اشتراکچی‌لریدن افغانستان قیینچلیک‌لری حل ایتیلیشی اوچون نقش یره‌تیش‌لرینی سوره‌گن.
اونینگ ایتیشیچه، دنیا جماعه‌چیلیگی طالبان بیلن توغری علاقه قوریش نی ایستمه‌یدی، بیراق کوپه‌یتیریشیچه، افغانستان ده جاری انسانی فاجعه نی دوامی بار و ۱۸ میلیون کیشی نی تأثیر آستیده آلگن.
روسیه و چین جمهوررئیس‌لری «جی ۲۰» ییغینی گه شرکت قیلمه‌دی، بیراق اولرنینگ نماینده‌لری افغانستان خصوصیده اوز خواطرلرینی بیلدیردی.
