کابل شهری ده سلام‌وطندار نینگ خبرنگاری هیداوچیلر بیلن اوتکزگن مصاحبه‌سی اساسیده، ۷ آیدن بویان اوزباشیمچه کیشی‌لر کابل شهری نینگ بیر قطار ایستگاهلریده هیداوچیلردن اخاذی آلگن.
سلام‌وطندار اوشبو موضوع نی تیکشیریش اوچون کابل شهری نینگ سرای شمالی، کوته سنگی و سینما پامیر ساحه‌‌لریده‌گی ایستگاه‌لرنی نمونه صفتیده تنله‌گن که اوشبو معلومات اساسیده، ۷ آیدن بیری یالغیز مذکور اوچ ایستگاه‌دن ۴۴میلیون ۶۸۸ مینگ افغانی اخاذی آلینگن.
مذکور ایستگاه‌لرده‌گی هیداوچیلردن قطاری نینگ ایتیش‌لریچه، کونیده ۱۰-۷ مرته یولاوچیلرنی تاشیدیلر و هر مرته اوتیب-قیتیش بیلن، کرولا رسوملی (شخصی و تکسی) موترلر ۱۰ افغانی و فلانکوچ، مرسیدیز و آستانه تیپلی موترلر ایسه ۲۰ افغانی توللش گه مجبورلر.
بیزلرنینگ فیسبوک صحیفه‌میزگه باش اورینگ!
هیداوچیلردن جواد جاوید نینگ ایتیشیچه: «بو ییر جدا هم ترتیب سیز دیر نماینده‌لیک بیزلردن زور بیلن ۲۰ افغانی آله‌دی، چوکی‌لریمیزنی پس قیلگنلر. بیر لیتر تیل ۸۰ افغانی بولگن، قنده‌ی پوره قیله آله‌یلیک. نیردن پول تاپه‌یلیک، اوغیرلاوچیلیک یا-ده باشقه ناقانونی ایشلرنی خو بیزلر قیله آلمه‌یمیز.»
هیداوچیلردن باشقه بیری رحمت‌الله گه کوره: «اسلامی امارت نینگ قدرت گه ایریشگنیدن بیر ایکی آی اوتگنیدن کیین، نیچه مرته پول آله‌دیگن کیشی‌لر اوزگرگن و ایکی، اوچ قندهاری بار ایدی و حاضر ایسه اولر نینگ ییریگه شو کیشی‌لر کیلگن.»
ترانسپورت و ملکی هوانوردلیک وزیرلیگی نینگ عامه ترانسپورت‌نی ترتیب گه سالیش ریاستی تامانیدن سلام‌وطندار بیلن شریک بولگن معلومات اساسیده، سرای شمالی گه تیگیشلی پروژه جدید، هده مزار، میدان هوایی، پنجصد فامیلی ایستگاه‌لری ده فلانکوچ، مرسیدیز و آستانه رسوملی ۲۵۸ موتر اوشبو ریاست‌ده قید دیر.
شونینگدیک اوشبو معلومات اساسیده، سینما پامیر ساحه‌سی گه تیگیشلی واصل آباد پایین و واصل آباد بالا، چهل ستون ایستگاه‌لری و وزیر آباد نینگ چهل قلعه ایستگاه‌سیده ۱۷۴ موتر و کوته‌سنگی ساحه‌سی گه تیگیشلی سرای شمالی، قمبر تورت یولی، دشت برچی و سینما پامیر ایستگاهلریده ایسه ۲۳۳ موتر بار.
باشقه تامان‌دن، اوشبو ریاست مسئووللری تخمینی آمار ارایه قیلیش بیلن ایتیش‌لریچه، رویخط گه آلینگن موترلردن کوره رویخط گه آلینمه‌گن موترلر ایکی برابر دیر.
مذکور ریاست‌ده قید ایتیلمه‌گن موترلردن کوپ قطاری نی کرولا رسوملی (تکسی و شخصی) موترلر تشکیل بیره‌دی و مرسیدیز، فلانکوچ و آستانه تیپلی موترلر ایسه اوشبو ریاست‌ده قید ایتیلگن موترلردن دیر.
شونده‌ی بیرحالده، ترانسپورت و هوانوردلیک وزیرلیگی تامانیدن سلام‌وطندار گه بیریلگن معلومات اساسیده، کونیده اوزباشیمچه‌لیک کیشی‌لر یالغیز ترانسپورت وزیرلیگی‌ده راجستر بولگن اوشبو ساحه‌ده‌گی ۶۶۵ موتردن یوز‌مینگ افغانی‌دن آرتیق پول نی اخاذی‌لیک قیله‌دیلر.
باشقه بیرتامان‌دن، تخمینی شکلده، ترانسپورت و هوانوردلیک وزیرلیگی تامانیدن راجستر بولمه‌گن موترلر نینگ رقمی ۱۳۳۰ موتر گه ییتیشیه‌دی که کونیده مذکور موترلردن یوز‌مینگ افغانی‌دن آرتیق پول اخاذی بولیشی نی کورسته‌دی.
برچه‌سی بیلن اوشبو اوچ ایستگاه ده ۷ آی ایچیده اخاذی‌لیک بولیشی گه دایر سلام‌وطندار گه ییتیب کیلگن معلومات اساسیده، ۵۴ میلیون افغانی اوز باشیمچه کیشی‌لر تامانیدن هیداوچیلردن پول آلینگن و اوشبو پول‌لر تقدیری نامعلوم.
عین حالده، هیداوچیلر نینگ سلام‌وطندار گه ایتیش‌لریچه، مذکور کیشی‌لر اوزلری نی اسلامی امارت گه تیگیشلی بولگنلری نی ایتگنلر.
هیداوچیلردن احمدالله نینگ ایتیشیچه: «حاضر ایسه اوشبو ایکی اوچ کیشی هر کون اون_اون افغانی آله‌دیلر و بیزلر بیلمه‌یمیز که بو پول‌لر نیمه بوله‌دی و بیزلر گه حوزه‌دن معرفی بولگنلری نی ایته‌دیلر و بیزلر گه حوزه‌دن بولگنلری یا-ده اسلامی امارت دولتی گه تیگیشلی بولگنلری خصوصیده انیق بیر سند نی ارایه قیلمه‌یدیلر.»
هیداوچیلردن باشقه بیری غلام‌سخی گه کوره: «ولا بیزلرنی خو رضایتی‌میز یوق، بیزلر پول بیرمه‌گنی‌میز پیتده موترنی اوریب و تیر نی پنچر قیله‌دیلر و زوردن پول آله‌دیلر.»
شونده‌ی بیرحالده، خوفسیزلیک حوزه‌لر گه تیگیشلی امنیتی کیشی‌لر نینگ ایتیش‌لریچه، اولر مذکور کیشی‌لر بیلن هیچ مناسبت‌لری یوق.
کابل شهری ۳-خوفسیزلیک حوزه اداری اورین‌باسری ضیاالحق مشعل نینگ ایتیشیچه، مذکور پول‌لر تیگیشلی ناحیه‌لر تامانیدن توپلنه‌دی، بیراق ۳-حوزه رئیسی قدرت‌الله امین بو موضوع نی رد قیلیب سلام‌وطندار گه ایتیشیچه، اوز باشیمچه کیشی‌لر بو گَل ایشلرنی قیله‌دی. اونینگ ایتیشیچه: «هر دایم بوتون قیین‌چیلیک‌لر اوچینچی حوزه‌ده بار که بیزلر نیردن‌سیزلر دیب سوره‌سه‌ک ترانسپورت‌دن دیه‌دیلر و بیر قطاری هم ترانسپورت‌دن دیر و شونینگدیک بیر قطار کیشی نی هم کوردیک که ترانسپورت‌دن ایمس ایکن‌لر و اوز باشیمه‌چه کیشی‌لر ایکن‌لر.»
باشقه بیرتامان‌دن، کابل شهری ۱۷-خوفسیزلیک حوزه نینگ اداری اورین‌باسری حاجی عاتف، بو خبردن خبرسیزلیگی نی بیلدیریب ایتیشیچه، شونده‌ی کیشی‌لر موجود بولگن بیرحالده، اولر نینگ قولگه آلیش‌لری اوچون اقدام قیلیش‌لری ممکن.
شونینگدیک کابل شهری ۱-خوفسیزلیک حوزه نینگ آمری صدیق‌الله منصور مجاهد نینگ ایتیشیچه، بو کیشی‌لر اولر گه باغلیق ایمس؛ بیراق اولر نینگ تصدیق قیلیش‌لریچه، اوشبو ایستگاه‌لردن قطاریده اخاذی‌لیک بوله‌دی.
بیزلرنینگ توییترده هم تعقیب قیلینگ!
برچه‌سی بیلن ترانسپورت و هوانوردلیک وزیرلیگی سوزلاوچیسی امام‌الدین احمدی هم کابل شهری نینگ ایستگاه‌لریدن قطاریده هیداوچیلردن پول اخاذی بولیشی‌نی تصدیق‌لب، بو کیشی‌لر بیرقطار ارگان‌لر تامانیدن وقتینچه‌لیک بیر شکلده معرفی بولگنلیگی ممکن دیدی. بیراق ترانسپورت وزیرلیگی نینگ سوزلاوچیسی گه کوره، کابل شهری نینگ هیچ بیر ایستگاهلریده کیمسه نینگ معرفی قیلیشمه‌گن.
بو توغریده کابل امنیه قومندانلیگی نینگ فکر_ملاحظه‌سینی اورگنیش اوچون تلاش قیلدیک؛ بیراق کوپ سعی و حرکت‌لر بیلن مؤفق بولمه‌دیک.
ایتیش‌کیره‌ک که، کابل شهریده یوزلرچه ایستگاه و مینگ‌لرچه مسافر تاشووچی موتر بار که اولردن اخاذی آلینه‌دی و اوچ ساحه‌ده آلینه‌دیگن پول‌لر سلام‌وطندار گه ییتیب کیلگن معلومات گه قره‌گنده نیچه برابر بولیشی ممکن.
