قندهار و قندوز امنیتی مسئوللری، رمضان هییت بیره‌‌می نینگ بیرینچی کونیده مذکور ولایت‌لرده ماین پارتلش حادثه‌سی یوزبیرگنیدن خبر بیریشگن. مذکور پارتلش‌لر قندهار نینگ میوند و پنجوایی تومنی و شونینگدیک قندوز شهریده یوزبیرگن که نتیجه‌ده، ۹ تینچ‌اهالی هلاک و باشقه ۱۷ تینچ‌اهالی ایسه یره‌لنگن.
قندهار پولیسی سوزلاوچیسی جمال‌ناصر بارکزی نینگ سلام‌وطندارگه ایتیشیچه، بیرینچی پارتلش بوگون (پنجشنبه ۲۳- ثور) توشدن آلدین میوند تومن بازاریده، تینچ‌اهالی مینیلگن بیر موتر یول چیککه‌سیده جایلشتیریلگن ماین گه دوچ کیلیشی بیلن یوزبیرگن. اونگه کوره، بو حادثه‌ده ۵ کیشی جان بیرگن.
بارکزی نینگ کوپه‌یتیریشیچه، مذکور حادثه‌دن کیین پنجوایی تومنیده یوزبیرگن باشقه بیر پارتلش ده ۲ کیشی هلاک و باشقه ۳ کیشی ایسه یره‌لندی. حادثه قربانی‌لری آره‌سیده عیاللر و باله‌لرهم شامل دیر.
سلام‌وطندار اوزبیکی نی فیسبوک صحیفه‌سیده هم باش اورینگ!
بو پارتلش‌لر مسئولیتی نی حاضرگچه بیرار گروه یا-ده شخص بوینیگه آلمه‌گن؛ بیراق قندهار نینگ امنیتی بیر منبع‌سی بو حادثه نی طالبان گروهی گه نسبت بیرگن. شونده‌ی بیرحالده، طالبان رمضان هییت بیره‌م کونلرینی آتیش کیسین اعلام قیلگن ایدی.
باشقه بیر تاماندن قندوز ده ماین پارتلشی عاقبتیده بیر باله شامل ۲ تینچ‌اهالی هلاک و باشقه ۱۴ کیسی ایسه یره‌لندی. مذکور پارتلش بوگون توشدن آلدین ساعت ۱۱ اطرافیده قندوز شهری نینگ ۴- خوفسیزلیک حوزه‌سیده یوزبیرگن.
قندوز پولیسی سوزلاوچیسی انعام‌الدین رحمانی نینگ ایتیشیچه، اوشبو یول چیککه‌سیده جایلشتیریلگن ماین پارتلشی ده بیر باله شامل ایکی تینچ‌اهالی هلاک و باله‌لر و عیاللر شامل باشقه ۱۴ تینچ‌اهالی ایسه یره‌لنگن.
حادثه یره‌دارلری دارولنیش اوچون کسلخانه گه انتقال بیریلگن.
ایتیش کیره‌ک که شونینگدیک اوتگن کون زابل مرکزی قلات شهریده یاپیشقاق ماین پارتله‌شی عاقبتیده ۱۴ تینچ‌اهالی و ۳ حربی تن جراحتی کوتارگن ایدی. مذکور پارتلش‌لر مسئولیتی نی هم حاضرگچه بیرار گروه یا-ده شخص بوینیگه آلمه‌گن.
