مملکت جنوبی‌ده جایلشگن ملی اردو کوچلری نینگ اعلان قیلیشیچه، ۳ کون‌لیک آتیش‌کیسین یکونلنگنیدن سونگ، تروریسم‌گه قرشی تهاجمی و تازه‌لش عملیات‌لر باشله‌گنلر.
۲۱۵ میوند قول اردو قومندانلیگی نینگ بیر خبرنامه آرقه‌لی اعلان قیلیشیچه، اوشبو عملیات اوتگن کیچه هلمند مرکزی لشکرگاه شهری نینگ غربی‌ده و ناوه و نهرسراج تومن‌لریده باشلنگن. خبرنامه گه کوره، مذکور عملیاتده مارجه تومنیده طالبان نینگ حربی مسوولی شامل ۲۱ طالبان هلاک ایتیلگن.
۲۱۵ قول اردو قومندانلیگی تامانیدن نشر ایتیلگن خبرنامه‌گه کوره، مذکور عملیات ۱۰ ساعت دوام قیلیب و طالبان جنگریلریدن باشقه ۱۳ ته‌سی یره‌لنگن، لیکن طالبان گروهی حاضرگه‌قدر بوتوغریده فکر بیلدیرمه‌گن.
ایتیلیشیچه، اوتگن کیچه جمهورلیک ریاستی بیر خبرنامه نشر قیلیب، مملکت جمهور رئیسی محمداشرف غنی نینگ ملی اردو قومندان‌لری بیلن تلفون آرقه‌لی صحبت اوتکزگنیدن خبر بیرگن. خبرنامه‌گه کوره، اوشبو اوچره‌شووده جمهور رئیس غنی ملی اردو قومندانلریگه، طالبان جنگریلری اوروش‌گه دوام بیرگن صورتده، اولرگه قرشی تیارگرلیک آلیش‌لری اوچون بویروغ بیرگن.
ملی اردو قومندان‌لری نینگ جمهور رئیس‌گه ایشانچ بیریب ایتیش‌لریچه، طالبان گروهی آتیش‌کیسین قیلمه‌ی و اوروش‌گه دوام بیرگن صورتده، سرکوپ و نابود ایتیله‌دیلر.
رمضان هییتی مناسبتی بیلن طالبان گروهی و حکومت آره‌سیده ۳ کون‌لیک آتیش‌کیسین اعلان ایتیلدی. آتیش‌کیسین نینگ ایکی تامانیدن قبول‌لنیشی رضایت‌لی ایدی، لیکن مذکور ۳ کونده مملکت بیرقطار ولایت‌لریده قانلی واقعه‌لر یوز بیردی. هییت بیرینچی کونیده قندهار، قندوز و غزنی ولایت‌لریده پارتلش یوز بیریب و نتیجه ده بیرقطار کیشی‌لر هلاک و یره‌لنگن.
شونینگدیک، هییت نینگ ایکینچی کونیده کابل ولایتی نینگ شکردره تومنیده بیر مسجد ده یوز بیرگن پارتلشده ۱۲ کیشی هلاک و باشقه ۱۵ کیشی یره‌لنگن ایدی.
