حرارت‌نینگ کوتریلیشی، یاغینگرچیلیک‌نینگ ترتیب‌سیزلشووی و سوو تنقیص‌لیگی ننگرهارده عنعنوی ایکیش و حاصل ییغیب آلیش تقویمینی ایزدن چیقرگن؛ بوغدای مدتیدن آلدین پیشیب ییتیلماقده، سبزه‌واتلر حاصل ییغیب آلیش موسمیدن اول ضرر کورماقده، ایریم ایکینچیلیک ییرلری ایسه سوو تنقیص‌لیگی سببلی ایکین ایکیش جریانیدن چیتده قالگن. بونده‌ی شرایط‌ده دهقانلر تاباره آرتیب باره‌یاتگن معمالر گه روپره بولگن و متخصص‌لر ایسه اقلیم اوزگریشلری و هر بیر تومن‌نینگ اوزیگه خاص شرایط‌لریگه ماسلشتیریلگن یسمه عقل ایکینچیلیک تقویمینی ایشلب چیقیش ضرورلیگینی ایته‌دیلر.
ننگرهارنینگ حاصل‌خیز دشت‌لری، ایلگری فصللر نسبتن ترتیب بیلن المشگن و دهقانلر ایکین ایکیش تقویمینی آته‌لریدن میراث قیلیب آلگن حدودلرده، بوگون ایکیش و حاصل ییغیب آلیش مدت‌لری ایزدن چیققن.
عادی، اما حیاتی مهم بیر سوال شو کی: حرارت‌نینگ کوتریلیشی، یاغینگرچیلیک ترتیبی‌نینگ اوزگریشی و سوودن فایده‌لنیش امکانیت‌لری‌نینگ کمه‌یشی اوشبو ولایتده ایکینلرنینگ اوسیش دوری، ایکیش و حاصل ییغیب آلیش مدت‌لرینی اوزگرتیردیمی؟ قیسقه و انیق جواب: هه. بو اوزگریش وقتینچه‌لیک حادثه ایمس، بلکی مینگلب دهقان عایله‌لری‌نینگ حیات طرزیگه تأثیر کورسته‌یاتگن حقیقت دیر.
حرارت‌نینگ کوتریلیشی و ایریم حدودلرده اوسیش دوری‌نینگ قیسقریشی
ننگرهار افغانستان‌نینگ شرقی قسمیده جایلشگن بولیب، جغرافیه اورنی همده ییر اوستی و ییر آستی سوو منبعلریگه باغلیقلیگی سببلی اقلیم اوزگریشلریگه نسبتن یوقاری درجه‌ده ضعیف حسابلنه‌دی. جهان آزیق-آوقت دستوری، بیرلشگن ملتلر تشکیلاتی اطراف-محیط دستوری و افغانستان ملی اطراف-محیط‌نی محافظه قیلیش اداره‌سی تامانیدن اوتکزیلگن قوشمه تیکشیرو نتیجه‌لری شونی کورسته‌دی کی، مملکت‌نینگ کوپلب حدودلریده اوسیش دوری اوزه‌یگن بولسه-ده، ننگرهار و لغمان ولایت‌لری‌نینگ ایریم حدودلریده بو دور قیسقرگن.
نظام‌الله زیار، اطراف-محیط و اقلیم اوزگریشی بوییچه متخصص شونده‌ی دییدی: «میلادی ۲۰۲۵-ییلگچه موجود بولگن اقلیم معلومات‌لریگه کوره، ننگرهار ولایتیده حرارت‌نینگ آشیب باریش درجه‌سی یققال کوزه‌تیلماقده. بو اوسیش اینیقسه ایسیق کونلرده ایسیق تولقینلری‌نینگ کوپه‌یشی و بوغلنیش‌نینگ کوچه‌یشی شکلیده نمایان بوله‌دی. هوا اولگیدن ایرته‌راق ایسی باشله‌یدی، کوزگی ساووقلر هم ایرته‌راق باشلنه‌دی، بیراق بو حالت هر ییلی بیر خیل کوزه‌تیلمه‌یدی.»
دهقانلر بو اوزگریشلرنی اوز تنه‌سی بیلن حس قیلماقده. ننگرهارلیک ۲۲ یاشلی دهقان اظهارالدین شونده‌ی دییدی: «سونگی آلتی ییل ایچیده دهقانچیلیک و اقلیم ساحه‌سیده کوپلب اوزگریشلر یوز بیردی. حرارت‌نینگ آشیشی سببلی بوغدایمیز اولگیگه قره‌گنده ایرته‌راق پیشیب ییتیله‌دی. ایلگری بوغداینی شمال تاماندن ایکردیک، اما حاضر کوچلی ایسیق طفیلی ایکیش و حاصل‌نی ییغیب آلیش مدت‌لری اوزگرگن. ایسیق جوده ایرته باشلنه‌دی و اوزاق وقت دوام ایته‌دی. شو سببلی زراعت محصولات‌لریمیز ایرته‌راق پیشیب، ییغیب آلینه‌دی.»
دوامی بار…
