ایکینچیلیک و چارواچیلیک وزیرلیگی، اوشبو وزیرلیک معینی صدراعظم عثمانی بیر هیئت باشچیلیگیده، زراعت و سودا همکارلیکلرنی کینگه‌یتیریش و مستحکملش مقصدیده رسمی تشریف بیلن اوزبیکستان گه ییتیب بارگنیدن خبر بیردی.
اوشبو وزیرلیک سوزلاوچیسی شیرمحمد حاتمی گه کوره، اوشبو سفر دایره‌سیده افغانستان و اوزبیکستان اورته‌سیده‌گی همکارلیکلرنی کینگه‌یتیریش، ایکینچیلیک، چارواچیلیک و آزیق-آوقت‌نی قیته ایشلش مسئله‌لری بحث گه آلینه‌دی. او شونده‌ی دییدی: «بو سفردن مقصد ایکینچیلیک و چارواچیلیک ساحه‌سیده افغانستان و اوزبیکستان اورته‌سیده‌گی سودا همکارلیکلرنی کینگه‌یتیریش، آزیق-آوقت‌نی قیته ایشلش و ایکی مملکت اورته‌سیده امضالنگن شرطنامه‌لر عملی بولیش مسئله‌لری محاکمه قیلینه‌دی. اوشبو سفر دایره‌سیده تامانلر تخنیک و اقتصادیات، ایکینچیلیک و چارواچیلیک همکارلیکنی کینگه‌یتیش اوچون ینگی فرصت‌لرنی یره‌تیش حقیده فکر المشتیریش‌لری ممکن.»
بو، ایکینچیلیک وزیرلیگی رسمی‌لری‌نینگ اوزبیکستان گه بیرینچی سفری ایمس. قویاش ۱۴۰۲ ییل، عقرب آیی‌ده، صدراعظم عثمانی و ۱۴۰۴ ییل، حمل آیی‌ده ایسه زراعت وزیری مولوی عطاءالله عمری بو مملکت گه سفر قیلگن ایدیلر. اوشبو سفرلرده ایکینچیلیک، سووغاریش و چارواچیلیک ساحه‌لریده بولگن همکارلیکلرنی کینگه‌یتیریش حقیده بحث ایتیلگن ایدی.
شو بیلن بیرگه، ایکینچیلیک ساحه‌سیده بیلرمان اکرام مجددی‌نینگ ایتیشیچه، بونده‌ی سفرلر، افغانستان‌ده ایکینچیلیک، سووغاریش و چارواچیلیکنی رواجلنتیریش و زمانه‌وی لشتیریش اوچون اوزبیکستان‌نینگ بیلیم و تخنیک تجربه‌لریدن فایده‌لنیشگه زمینه یره‌تیشی ممکن. اونگه کوره: «بو سفر افغانستان‌ده ایکینچیلیک، سووغاریش و چارواچیلیکنی رواجلنتیریش اوچون مهم حرکت دیر؛ چونکی اوزبیکستان کبی رواجلنگن مملکت‌نینگ تجربه و همکارلیگیدن فایده‌لنیش، زراعت، سووغاریش و چارواچیلیک تیزیملرینی یخشی‌لشگه یاردم بیره‌دی.»
ایکینچیلیک ساحه‌سیده ینه بیر بیلرمان الیاس صدیقی هم، افغانستان زراعتینی رواجلنتیریش، سوو منبعلرینی یخشی باشقریش، سرمایه کیریتیش و خلق‌ارا بازارلردن فایده‌لنیشگه احتیاجی بارلیگینی بیلدیره‌دی.
اونینگ ایتیشیچه، اوزبیکستان‌ده زراعت میکانیزملشگنی اوچون، اوشبو مملکت یوقاریده قید ایتیلگن بولیملرده افغانستان بیلن همکارلیک قیلیشی ممکن.
شو بیلن بیرگه، بیلرمانلرنینگ فکریچه، افغانستان زراعتینی رواجلنتیریش فقط باشقه مملکتلر بیلن همکارلیکنی کینگه‌یتیریشگه باغلیق ایمس؛ بونینگ اوچون سرمایه کیریتیش، سوو منبعلرینی باشقریش، ایکینچیلیک واسطه‌لری و زمانه‌وی تکنالوژی‌لردن فایده‌لنیش هم ضرور. اولر گه کوره، بونده‌ی همکارلیک‌نینگ موفقیتی مذکور احتیاجلر عملده قیسی درجه‌ده تأمین ایتیلیشیگه باغلیق.
