د هرات محلي مسوولان وايي چې دغه ولایت کې د «حریت، اُمېد او شریعت» په نومونو درېوو غږیزو رسنیو په فعالیت پیل وکړ.
د هرات د اطلاعاتو او فرهنګ رییس احمدالله متقي سلاموطندار ته وايي چې یادو رسنیو «دوشنبه، وري ۱۳مه» په رسمي توګه دغه ولایت کې خپلې نشرات پیل کړي دي.
د سلاموطندار پښتو فېسبوکپاڼه وڅارئ
نوموړي د رسنیو فعالیت د رښتیا ویلو او اطلاعاتو خپرولو برخه کې ارزښتمند وباله او په وینا یې، رسنۍ کولای شي د لوېدیځ فرهنګي یرغل مخه ونیسي.
په ورته مهال د شریعت راډیو مسوول محمدنبي قاضيزاده د یادې رسنۍ د جوړېدو موخه عامه پوهاوی بللی او زیاته کړې یې ده چې یادې غږیزې رسنۍ به ۲۴ساعته خپرونې ولري.
په همدې حال کې د یاد ولایت چارواکي وايي، هغه رسنۍ چې د سرپرست حکومت د قوانینو پر بنسټ خپرونې ولري، ملاتړ به یې وکړي.
د هرات د محلي چارواکو د معلوماتو له مخې، دا مهال په دغه ولایت کې ۳۱ غږیزې او تصویري رسنۍ فعالیت لري.