د ا.ا د کورنیو چارو وزارت سرپرست سراجالدین حقاني د ملګرو ملتونو له لوري د سفر له بندیز سره سره په خپل لومړني بهرني سفر کې متحده عربي اماراتو ته تللی دی.
له نوموړي سره په دغه سفر کې د ا.ا د استخباراتو رییس عبدالحق وثیق او د هغه ورور انس حقاني هم ملګرتیا کوي. د یاد سفر موخه د دواړو هېوادونو ترمنځ د دوهاړخیزو اړیکو ښهوالی بلل شوی دی.
د سلاموطندار پښتو فېسبوکپاڼه وڅارئ
دغه پلاوي د خپل سفر پر مهال د متحده عربي اماراتو له امیر شیخ محمد بن زاید آل نهیان سره لیدلي او د دواړو هېوادونو د اقتصادي اړیکو پر پراختیا یې خبرې اترې کړې دي.
ا.ا د دغه سفر موخه د دوهاړخیزو اړیکو، په ځانګړې توګه په اقتصادي برخه کې پراخوالی ښودلی دی. یوشمېر کارپوهان هم د افغانستان د سرپرست حکومت د چارواکو د دغه ډول سفرونو پایلو ته خوشبینه دي.
د سیاسي چارو شنونکی محمدزلمی افغانیار پوپل سلاموطندار ته ویلي: «هیلهمند یم چې دغه سفرونه د هېواد په ملي ګټو را وڅرخېږي او هېوادونو هم دا درک کړې وي چې له اقتصادي او سیاسي اړخه باثباته افغانستان د نړۍ په هوساینه کې رول لوبوي.»
که څه هم ا.ا متحده عربي اماراتو ته د دغه پلاوي د سفر موخه یوازې په اقتصادي مسایلو پورې محدوده کړې، خو یوشمېر کارپوهان باور لري چې ښايي په دغه سفر کې پر ځینو سیاسي مسایلو هم خبرې وشي.
د سیاسي چارو یو بل کارپوه عزیز معارج وايي، د دوحې د راتلونکې غونډې لپاره د اسانتیاوو برابرول او له ا.ا څخه په دا ډول غونډو کې د هېوادونو ملاتړ او خوښي ترلاسه کول هغه څه دي چې ښايي دغه پلاوی یې په اجندا کې ولري.
د یادونې ده چې ملګرو ملتونو د ا.ا پر یوشمېر چارواکو د سفر بندیز لګولی، خو یوشمېر چارواکو په تېرو نږدې درېوو کلونو کې ځینو هېوادونو ته سفرونه کړي دي.
