د سرپرست حکومت د بهرنیو چارو وزارت سرپرست امیرخان متقي ویلي چې د ټاپي پروژې عملي کېدل د ا.ا لپاره لومړیتوب لري او په نږدې راتلونکې کې به یې په افغانستان کې عملي چارې پیل شي.
د سلاموطندار پښتو فېسبوکپاڼه وڅارئ
د دغه وزارت د ویاند مرستیال ضیااحمد تکل پرون (د زمري څلورمه، د پنجشنبې ورځ) پر اېکس لیکلي چې متقي دا خبره په کابل کې د ترکمنستان له سفیر خواجه عوضوف سره په لیدنه کې کړې ده.
نوموړي زیاته کړې چې خواجه عوضوف هم د ټاپي پروژې د عملي چارو په برخه کې د وروستیو پرمختګونو په اړه معلومات له متقي سره شریک کړي دي.
په خبرپاڼه کې زیاته شوې چې په یاده لیدنه کې د افغانستان او ترکمنستان ترمنځ د ډیپلوماټیکو اړیکو پر پیاوړتیا هم خبرې شوې دي.
بلهخوا ترکمنستان او پاکستان هوکړه کړې چې د افغانستان په غړیتوب سره به د ټاپي پروژې چارې پر مخ یوسي.
د کانونو او پټرولیم وزارت تر دې مخکې ویلي و چې د ټاپي پروژې د حقوقي ستونزو له حل وروسته به د دې پروژې عملي چارې په افغانستان کې بیاپیل شي.
ټاپي پروژه د افغانستان له لارې له ترکمنستان څخه پاکستان او هند ته ګاز لېږدوي. دا پروژه په ۲۰۱۶ کې د افغانستان، ترکمنستان، پاکستان او هند له لوري پرانېستل شوه، خو د ځینو سیمهييزو خنډونو او هېواد کې د سیاسي نظام د بدلون له کبله یې چارې تر اوسه عملي شوې دي.
