د امریکا ولسمشریزو ټاکنو کې د ډیموکرات ګوند نوماند جوبایډن خپل جمهوریت پلوه سیال ډونالډ ټرمپ ته په ټاکنو کې ماتې ورکړه او د دې هېواد ۴۶م ولسمشر شو. بایډن په داسې حال کې واک ته رسېږي چې په افغانستان کې د سولې او جګړې بحثونه تاوده دي او ټرمپ په قطر کې د افغان دولت او طالب استازيو ترمنځ د سولې خبرو پروسه پيل کړې ده.
خو اوس ویل کېږي چې د ټرمپ ماتې او د بایډن بریا به د افغانستان پر سیاسي کشالې ډېر اغېز ولري.
یو شمېر سیاسي کارپوهان په دې باور دي چې په سپینه ماڼۍ کې د جوبایډن حضور به د افغانستان په تړاو د امریکا بهرنۍ پالیسي بدله کړي. د چارو دغه کارپوهان وايي، امریکا نهشي کولای د افغان سولې او جګړې د تحولاتو له پام کې نیولو پرته د افغانستان په اړه کره او روښانه بهرنۍ پالیسي ولري.
د سیاسي چارو کارپوه مصطفا عليزاده سلاموطندار سره خبرو کې وويل، افغان حکومت باید امریکا کې له دغه منځته راغلي فرصت څخه پوره ګټه واخلي.
عليزاده د افغانستان د سولې مسلې او بینالافغاني مذاکراتو ته په اشارې ویلي، د نړیوالې ټولنې له هوکړې پرته په افغانستان کې سوله نهشي تامینېدلای.
یو بل سیاسي کارپوه باقر محسني سلاموطندار ته وویل، د افغانستان سوله او د افغانستان په اړه د امریکا بهرنی سیاست د افغانستان اوسني وضعیت سره تړاو لري.
د محسني په اند، جوبایډن په کراتو د افغانستان د روان وضعیت په اړه خپله ناهیلي ښودلې ده او ویلي يې دي چې په افغانستان کې د ملت جوړونې بهیر له ماتې سره مخ دی.
دغه سیاسي کارپوه، دا بدبینۍ د سولې په بهیر او د افغانستان په اړه د امریکا په بهرني سیاست کې اغېزلرونکې بولي.
د جوبایډن بریالیتوب له ډېرو خوشبینه غبرګونو سره هم مخ شوی دی. د افغانستان په ګډون یو شمېر هېوادونو په سپینه ماڼۍ کې د نوموړي حضور په نېک فال نیولی او مبارکې یې ورته ویلې ده.
ولسمشر محمد اشرف غني نن سهار په یوه ټوېټ کې د امریکا ولسمشرۍ ټاکنو کې د جوبایډن او د امریکا د ولسمشر د مرستیالې کاملا هارېس د بریا مبارکي ویلې ده.
ولسمشر غني ویلي چې له تروریزم سره د مبارزې او په افغانستان کې د سولې رامنځته کولو په ګډون، افغانستان امریکا سره د سټراټیژیکو همکاریو دوام ته خوشبینه دی.
د ولسمشر دویم مرستیال سروردانش هم پر خپله ټوېټرپاڼه د دغه هېواد ولسمشرۍ ټاکنو کې د جوبایډن بریا ته مبارکي ورکړې ده.
دانش ویلي، افغان ولس او حکومت د تېرو کلونو په اوږدو کې د بشري حقونو، د ښځو حقونو، بیان ازادۍ او د عدالت او برابرۍ ټینګښت په برخه کې لویې لاسته راوړنې درلودلې دي.
نوموړي هیله څرګنده کړې چې امریکا د دغو لاسته راوړنو او ارزښتونو ساتلو په برخه کې افغان حکومت سره همکاري وکړي.
پخواني ولسمشر حامد کرزي او د ملي مصالحې عالي شورا رييس عبدالله عبدالله، د افغانستان د وحدت ګوند مشر محمد محقق او جهادي قومندانانو څخه عطامحمد نور هم د امریکا ولسمشرۍ ټاکنو کې د جوبایډن بریا ته مبارکي ورکړې ده.
