د ننګرهار د والي ویاند عطاالله خوږیاڼی سلاموطندار ته وايي، تېره شپه د ملي امنیت ځانګړو ځواکونو «۰۲قطعې» د جلال اباد ښار اوومه ناحیه کې د اخندزاده ګانو کلي کې ځانګړي عملیات ترسره کړي چې پايله کې يې د داعش ډلې د ځانمرګو بريدونو مسوول نیولی دی.
د نوموړي په وينا، دغه کس محمد نبي نومېږي، په ایوبي مشهور دی او له نوموړي یو میل توفنګچه هم نيول شوې ده.
خوږیاڼی زياتوي چې همداراز د جلال اباد ښار نهمه ناحیه خوشګمبد سیمه کې د داعش ډلې یو قاضي او اداري امر قاضي امین مشهور په ابو معاویه» د مقاومت په ترڅ کې وژل شوی دی.
نوموړی وايي، ځانګړو ځواکونو له وژل شوي کس نه یو میل کلاشنکوف هم نيولی دی.
د يادولو ده چې یاد کس په تېر کې د داعش ډلې عمومي نظامي مشر شېخ ابو عمر ته کار کاوه.
داعش ډلې تر اوسه پورې په دې اړه څه نه دي ویلي.
