د کونړ ولایت په سرکاڼو، مرورې او نرنګ ولسوالیو کې د لمریزې برښنا پر مټ د اوبو څلور شبکې جوړې او نن ترې ګټه اخيستل پیل شول چې څلور زره جریبه للمي ځمکه به پرې خړوبه شي.
دغه شبکې د کونړ پر سیند جوړې شوي دي.
د اوبو لګولو پر دغو شبکو کرنې او مالدارۍ وزارت ۹۱،۲ میلیونه افغانۍ لګولي چې نن د کونړ والي او یاد وزارت چارواکیو پرانيستلې.
د کرنې او مالدارۍ وزارت مرستیال حشمت الله غفوري په دې تړاو رسنیو ته وویل، پلان یې دی هغه ځمکې چې د کونړ له سینده لوړې او د کانال جوړولو امکان ورته کم وي، د سولري برښنا پرمټ همداسې شبکې ورته جوړې کړي.
د کرنې او مالدارۍ وزارت مسوولانو ویلي، را روان کال به د کونړ په بېلابېلو ولسوالیو کې د کرنې، مالدارۍ او اوبو لګونې برخه کې د ۳۸۰ میلیونه افغانیو په ارزښت بېلابېلې پروژې پلې کړي.
د کونړ والي محمد اقبال سعید وویل، د دغو شبکو په مرسته به د کونړ کرنې سکټور کې مثبت بدلون راشي، کرنیز تولیدات به لوړ او د نباتي پوښښ په رامنځته کېدو به د وارداتو کچه راکمه شي.
د دغو څلورو شبکو له ډلې د سرکاڼو او او مرورې د اوبو لګونې له سیسټمونو ځمکو ته عملأ اوبه ورپورته شوې.
د کونړ د سرکاڼو، مرورې او نرنګ ولسوالیو اوسېدونکیو او کروندګرو په خپلو سیمو کې د اوبو د دا وړ لویو شبکو پر جوړېدو خوښي ښوده او ویل یې، د دغو شبکو په مرسته به شاړ ډاګونه او وچې للمې په حاصل راشي.
د کونړ اوسېدونکي او کروندګر له حکومته غوښتنه کوي چې د کونړ پر سیند دا شان لویې پروژې پلې کړي.
