د میدانوردګ محلي مسوولان وايي چې د دغه ولایت والي قاري بختیار معاذ پرون سهشنبه د غبرګولي ۲۳مه میدانښار کې له یوشمېر چینایي پانګوالو سره کتلي دي.
د میدانوردګ ولایت مقام له لوري سلاموطندار ته په رالېږل شوې خبرپاڼه کې راغلي چې په دغه لیدنه کې چینایي پانګوالو ژمنه کړې چې د یاد ولایت په صنعتي پارک کې به د ۲۵۰زره امریکایي ډالرو په مالي لګښت د لوښو مېنځلو، سیمي جالیو او د ماشومانو لپاره د پمپرو تولید کارخونه جوړه کړي.
د سلاموطندار پښتو فېسبوکپاڼه وڅارئ
د خبرپاڼې له مخې، چینایان میدانوردګ کې پانګونې ته لېوالتیا لري او په پام کې ده چې د دغه ولایت صنعتي پارک لپاره د برښنا سېسټم هم جوړ کړي.
خبرپاڼه کې راغلي چې د میدانوردګ والي قاري بختیار معاذ چینایي پانګوالو ته ډاډ ورکړی چې د میدانوردګ ولایتي اداره به ورته اسانتیاوې برابرې کړي.
نوموړي زیاته کړه، هڅه روانه ده چې د هېواد یوشمېر نور افغان پانګوال هم میدانوردګ ولایت ته د پانګونې لپاره وهڅوي.
