پر اسراییلو د ایران او حزبالله ډلې توغندیز بریدونه تر ډېره د اسراییل سوېلي سیمې په نښه کوي، خو تازه رسنیو راپور ورکړی چې یوشمېر توغندي په مرکزي سیمو هم لګېدلي دي.
حزبالله ډلې هم د ایران له توغندیزو بریدونو سره جوخت پر اسراییلو خپل راکېټي بریدونه کړي او شمالي سیمې یې په نښه کړي دي.
د ماشومانو لپاره د ملګروملتونو ملاتړې ادارې یا یونېسف اعلان کړی چې د منځني ختیځ د جګړو له پیل راهیسې تراوسه له ۲۱۰۰ څخه زیات ماشومان وژل شوي او یا ټپیان دي.
یاد سازمان نن سهشنبه د مارچ ۲۴مه راپور ورکړی چې په دې موده کې ۲۰۶ ماشومان په ایران، ۱۱۸ ماشومان په لبنان، څلور ماشومان په اسراییل او یو ماشوم په کویت کې وژل شوي دي.
په کولمبیا کې د پوځ یوه الوتکه له الوتنې لږ وروسته غورځېدلې چې له امله یې لږترلږه ۳۴ کسان وژل شوي او لسګونه نور ټپیان دي.
د یاد هېواد د دفاع وزیر پېدرو سانچېز ویلي چې دا «غمجنه پېښه» د هېواد په سوېل کې د پورتولېګیوسامو په سیمه کې رامنځته شوې چې د پوتومايو ولایت پورې اړه لري. دغه سیمه د پېرو او اکوادور سره پوله لري.
استرالیا او اروپایي ټولنه له اته کلونو اوږدو مذاکراتو وروسته یو سوداګریز تړون لاسلیک کړی چې له مخې به یې د اروپایي توکو پر ډېری صادراتو تعرفې لرې او د استرالیا د حیاتي معدني موادو صادرات به پراخ شي.
د بلومبرګ د راپور له مخې چې دوشنبه، د مارچ ۲۳مه خپور شوی، د اسراییل مرکزي بانک ویلي چې د ۲۰۲۳ څخه تر ۲۰۲۵ کلونو پورې اقتصادي زیان یې، د ناخالص کورني تولید شاوخوا ۸.۶ سلنه جوړوي. دا زیانونه تر ډېره د غزې په جګړه او له لبنان سره په نښتو پورې تړاو لري.
ایران خبرداری ورکړی که د امریکا ولسمشر ډونالډ ټرمپ د ایران د برښنا شبکې پر وړاندې ګواښ عملي کړي، دغه هېواد به د خلیج ګاونډیو د انرژۍ او اوبو سیسټمونه هم په نښه کړي.
د امریکا ولسمشر ډونالډ ټرمپ د هرمز تنگي بېرته پرانیستلو لپاره ایران ته د ۴۸ ساعتونو وخت ورکړی چې سبا سهشنبه به پای ته ورسېږي.
د ملګروملتونو عمومي منشي انتونیو ګوترېش، اعلان کړی چې د نړۍ اقلیم په بېړني حالت کې دی. د هواپیژندنې نړیوالې ادارېWorld Meteorological Organization تازه راپور ښيي چې ټولې مهمې اقلیمي نښې د خبرداري په حالت کې دي.
د کیوبا د بهرنیو چارو مرستیال وزیر، کارلوس فرناندس ډي کُسیو، د امریکا د ولسمشر ډونالډ ټرمپ له تازه ګواښونو وروسته وویل چې کیوبا د هر ډول احتمالي پوځي شخړې لپاره تیار دی.
رویترز خبري اژانس راپور ورکړی چې هاوانا او واشنګټن د روان میاشتې په پیل کې د خبرو میز ته کیناستل، په داسې حال کې چې د تېلو په اړه د امریکا تحریمونه د کمونیسټ رژیم اقتصاد لاهم له کړکېچ سره مخ کړی دی.
د هوا پېژندنۍ نړیوال سازمان(WMO) وايي چې له ۲۰۱۵ څخه تر ۲۰۲۵ کلونو پورې د نړۍ په ثبت شوي تاریخ کې تر ټولو ګرمه یوولس کلنه دوره بلل شوې او ۲۰۲۵کال د دویم یا درېیم تر ټولو ګرم کال په توګه ثبت شوی دی.
امریکا او اسراییل وايي چې د ایران پر وړاندې روانه جګړه ښايي د لومړنیو اټکلونو په پرتله اوږده شي او د هرمز تنګي د بیاپرانېستلو عملیات ممکن څو اوونۍ نور هم دوام وکړي.
د اناتولي خبري اژانس د راپور له مخې چې نن دوشنبه یې خپور کړی، اسراییلي رسنیو ویلي چې د واشنګټن هدف یوازې د سمندري لارې پرانیستل نهدي، بلکې امریکا هڅه کوي د انرژۍ نړیوالو بیو باندې د ایران ادعا شوی پراخ نفوذ هم راکم کړي.
د لبنان حزبالله ډلې ادعا کړې چې د یکشنبې په ورځ یې د اسراییلو پر وړاندې ۶۳ ځله عملیات کړي.
د راپورونو پراساس، د لبنان حزبالله ویلي چې د اسراییلي ځواکونو پر وړاندې دغو عملیاتو کې د توپمرمۍ، راکټونه او بېپیلوټه الوتکې کارول شوي، خو د اوښتې مرګژوبلې جزییات یې نه دي ورکړي.
د فلسطین روغتیايي چارواکو ویلي، پر بېلابېلو سیمو د اسراییل وروستیو هوايي بریدونو کې لږ تر لږه ۴ کسانو ژوند بایللی او ۱۰ نور ټپیان شوي.
نړیوالو رسنیو نن دوشنبه د حمل ۳ / مارچ ۲۳ راپور ورکړی چې اسراییلو تېره ورځ د غزې ځینې برخې بمبار کړې.
د امریکا ولسمشر ډونالډ ټرمپ د ایران اسلامي جمهوریت ته خبرداری ورکړی چې د هرمز تنگه ژر تر ژره پرانیزي.
ټرمپ په خپلې ټولنیزې شبکې ټروت سوشیل لیکلي چې ایران ته یې د تنگې د پرانیستلو لپاره ۴۸ساعته مهلت ورکړی دی.
د ملګروملتونو سرمنشي، د انتونیو ګوترېش له متحده ایالات او اسراییل وغوښتل چې له ایران سره روان کړکېچ ته د پراخېدو مخکې د پای ټکی کېږدي، او خبرداری یې ورکړ چې دا جګړه کېدای شي «له کنټروله ووځي» او جدي ناوریني پایلې ولري.
د ملګروملتونو سازمان په منځني ختیځ کې د جګړې او روان کړکېچ د کمېدو لپاره له ښکېلو اړخونو غوښتنه کړې چې د وضعیت د بدلون لپاره د خبرو لار غوره کړي.
د اوکراین ولسمشر ولودېمېر زېلېنسکي ویلي چې د منځني ختیځ او خلیج په سیمو کې د ایراني بېپيلوټه الوتکو «شاهد» پر ضد د دفاع لپاره د اوکراین ۲۰۰ څخه زیات پوځي کارپوهان فعالیت کوي.
