ارګ بېګاه پر خپل اېکس لیکلي چې د ریاستالوزرا سیاسي مرستیال محمد عبدالکبیر پرون په کابل کې د جاپان له سفیر تاکایوشي کورومایا سره لیدلي دي.
د جاپان سفیر د دې لیدنې پر مهال په کابل کې له وروستي ځانمرګي برید وروسته دغه برید غندلی او په اړه یې خپله غمرازي کړې ده. د خبرپاڼه له مخې، نوموړي له نشهيي توکو سره د ا.ا مبارزه ستایلې او له افغانستان سره یې د خپلو مرستو پر دوام ټینګار کړی دی.
د سلاموطندار پښتو فېسبوکپاڼه وڅارئ
هغه ویلي چې هېواد یې له نشهيي توکو سره د مبارزې برخه کې له ۱۰ میلیونه ډالرو ډېره مرسته اعلان کړې، د افغانستان د تاریخي سیمو د ساتنې په موخه په پلان کې لري چې لومړی په کابل کې د ملي موزیم لپاره ۳۰۰ زره ډالر ځانګړي کړي.
د جاپان سفیر د دواړو هېوادونو د اړیکو پر پیاوړتیا ټینګار کړی او ویلي یې دي چې د افغانستان په نهو ولایتونو کې به ۱۶۵ لومړني ښوونځي جوړ کړي. تاکایوشي کورومایا زیاته کړې چې هېواد یې د افغاني ټولنې ارزښتونو ته په درنه سترګه ګوري او د جي۷ هېوادونو او ا.ا ترمنځ د اړیکو جوړولو لپاره هم هڅې کوي.
محمد عبدالکبیر هم په بېلابېلو برخو کې له افغانستان سره د جاپان له مرستو مننه کړې او ویلي یې دي چې د کابل او توکیو ترمنځ اړیکې د دواړو هېوادونو په ګټه دي. هغه جاپان د ا.ا په بهرني سیاست کې یو مهم هېواد بللی دی.
ارګ د هغه له خولې لیکلي: «ا.ا هیله لري چې د دوحې د درېیمې غونډې ژمنې عملي شي. ا.ا د یوه مسوول حکومت په توګه په یوازېتوب او د چا له مرستې پرته پر ټولو ژمنو عمل کړی دی.»
محمد عبدالکبیر د ا.ا له لوري له نشهيي توکو سره د مبارزې عالي کمېسیون د ژرترژره جوړېدو خبر ورکړی او ویلي یې دي چې یاد کمېسیون به له همکارو بنسټونو او هېوادونو سره غونډې جوړې کړي.
