د تخار امنیتي مسوولان وايي چې د دغه ولایت په ینګيکلا ولسوالي کې یوې ځوانې ښځې ځان وژلی دی. د مسوولانو په وینا، یاده ښځه ۲۳ کلنه ده او د موږکو د وژنې په درملو یې ځان وژلی دی.
د سلاموطندار پښتو فېسبوکپاڼه وڅارئ
د تخار د امنیې قومانداني ویاند عبدالمبین ساپي سلاموطندار ته ویلي چې دا پېښه بېګاه د ینګيکلا ولسوالي په کفترعلي سیمه کې شوې ده.
د هغه په خبره، یاده ښځه طاهره نومېده او ۲۳ کلنه وه چې د موږکو د وژنې درمل یې خوړلي او خپل ژوند ته یې د پای ټکی ايښی دی.
د تخار د امنیې قومانداني ویاند د دې پېښې لامل او انګېزه کورنۍ ستونزې بولي او په وینا یې، په اړه یې لومړنۍ څېړنې هم پیل شوې دي.
دا داسې مهال ده چې په وروستیو څو میاشتو کې د هېواد په بېلابېلو ولایتونو کې د ځانوژنې پېښې زیاتې شوي او د ډېری هغو لاملونه کورنی تاوتریخوالی، وزګارتیا، بېوزلي او ناچاري ښودل شوي دي.
