د پنجشېر محلي مسوولان وايي چې د دغه ولایت د کانونو استخراج او کیندنې برخه کې روسي پانګوالو، پانګونې ته لېوالتیا ښودلې ده.
د پنجشېر والي ویاند سیفالدین لټون نن چهارشنبه، چنګاښ ۲۷مه سلاموطندار ته وویل چې دغه ولایت ته یوه ډله روسي پانګوال او د کانونو برخې متخصصان ورغلي او د والي ترڅنګ یې له نورو چارواکو سره هم لیدلي دي.
د سلاموطندار پښتو فېسبوکپاڼه وڅارئ
د نوموړي په وینا، روسي پانګوالو د دې لیدنو ترڅنګ لېوالتیا ښودلې چې د ټکنالوژۍ پر مټ کولای شي، د یاد ولایت کانونه استخراج او پروسس کړي.
د پنجشېر والي ویاند همداراز ټينګار وکړ چې روسي پانګوالو ته د دغه ولایت پر کانونو د پانګونې لپاره د امنیت ډاډ ورکړل شوی او په وینا یې، «والي دوی ته ویلي چې په قانوني توګه د کانونو پر استخراج پانګونه کولای شي.»
د یادونې وړ ده چې په دې وروستیو کې د روسي پانګوالو ترڅنګ، د یوشمېر نورو هېوادونو پانګوالو هم د دغه ولایت د زمرد پر کانونو پانګونې ته لېوالتیا ښودلې ده.