په افغانستان کې د ترهګرو ډلو د شتون په اړه د ځینو ګاونډیو هېوادونو له اندېښنو وروسته د روسیې دفاع وزیر په دې وروستیو کې ادعا کړې چې افغانستان لا هم د سیمې او منځنۍ اسیا د بېثباتۍ اصلي سرچینه ده.
د سلاموطندار پښتو فېسبوکپاڼه وڅارئ
د روسیې د دفاع وزیر اندري بیلوسوف د جمعې په ورځ په قزاقستان کې د ډلهییز امنیتي تړون د دفاع وزیرانو شورا په غونډه کې ویلي، یوشمېر توندلارې ډلې په افغانستان کې شته او له افغانستانه بهر د هغوی د پراخېدو امکان هم نهشي ردېدلای. هغه د دغو اندېښنو د حل لپاره ټینګار کړی چې تاجکستان باید له افغانستان سره خپلې پولې ټینګې کړي.
خو د ا.ا ویاند ذ.بېحالله م.جاهد بیا د ا.ا په اړه د روسي چارواکو د څه مودې وړاندې څرګندونو څخه خوښ دی او له ا.ا سره د هغوی اړیکې مهمې بولي.
د سیاسي او پوځي چارو کارپوهان هم وايي چې د افغانستان په اړه د روسي چارواکو په څرګندونو کې بېباوري د افغانستان په اړه د دغو هېوادونو دوهمخی سیاست په ګوته کوي.
د سیاسي چارو کارپوه محمدباقر محسني د افغانستان په اړه د هېوادونو څرګندونې پر افغانستان د فشار یوه بڼه بولي.
هغه زیاتوي: «د بېوزلۍ، بېکارۍ او د خلکو ناخوښي د ترهګرو ډلو د پیاوړتیا لپاره یو بستر دی. د مرکزي اسیا او سیمې هېوادونه اندېښمن دي، که یو متمرکزه دولت جوړ نهشي، افغانستان به د ترهګرۍ د زیاتېدو لامل شي.»
د نظامي چارو کارپوه عزیز ستانکزی هم بیا وايي، هېوادونه دې د ادعاوو پر ځای، د ترهګرۍ له منځه وړلو لپاره له ا.ا سره په ګډه کار وکړي.
نوموړی زیاتوي: «د سیمې ځینې هېوادونه د افغانستان په اړه دوهګونی سیاست چلوي؛ یو ښکاره او بل د پردې تر شا؛ دا له واقعت نه لرې څرګندونې د عامه ذهنونو د ګډوډولو لپاره دي. که دوی رښتیا د ستونزې حل غواړي، باید له امارت سره خپل استخباراتي موارد شریک کړي او امارت هم باید د ابهام د له منځه وړلو لپاره استخباراتي موارد له هغوی سره شریک کړي.»
د يادونې ده چې د پاکستان او قرغېزستان چارواکو تېره اوونۍ په خپلو څرګندونو کې په افغانستان کې د ترهګرو ډلو د موجودیت په اړه اندېښنه ښودلې وه او دا يې د ټولې سيمې لپاره ګواښ بللی و.
