په تېرو ۲۴ ساعتونو کې پر لبنان د اسراییلو وروستیو بریدونو کې د دوو روغتیاپالو په ګډون ۵۱ کسان وژل شوي.
د لبنان د روغتیا وزارت یوه خبرپاڼه کې ویلي: اسراییل د نړیوالو قوانینو او بشري اصولو سرغړونې ته دوام ورکوي او د روغتیايي کارکوونکو پر ضد یې جنایتونه ډېر کړي.
خبرپاڼه کې ویل شوي چې د مارچ له دویمې نېټې راهیسې چې اسراییلي ځواکونو نوي پوځي عملیات پیل کړي، په ټول لبنان کې ۲ زره او ۸۴۶ کسان وژل شوي.
ملګرو ملتونو هم ویلي، له هماغې مودې راهیسې د اسراییلو په څه باندې ۱۳۰ بریدونو کې لږ تر لږه ۱۰۳ لبناني روغتیايي کارکوونکي وژل شوي او ۲۳۰ نور ټپیان دي.
سره له دې چې د امریکا په منځګړیتوب د لبنان حزبالله او اسراییل ترمنځ د تېرې اپرېل میاشتې په ۱۶مه اوربند وشو، خو بریدونه دوام لري او لا زیات شوي.
د مارچ له دویمې نېټې راهیسې د اسراییل بریدونو له امله بیا تر ۱.۲ میلیون ډېر لبنانیان بېځایه شوي دي.