بوگون ۲۷- حوت خبرچیلر ملی کونی دیر. بو کون ییتیب کیلیشی بیلن خبرچیلر و رسانه‌لردن حمایت قیلووچی نهادلر قویاش ۱۳۹۹- ییل نی خبرچیلر و رسانه‌لرگه قرشی قیین بیر ییل دییشگن.
مملکت غرب حوزه‌سیده خبرچیلرنی سلقش کمیته مسئولی همایون نظری، قویاش ۱۳۹۹- ییل نی خبرچیلر اوچون قانلی بیر ییل دیب ایتیشیچه، خبرچیلر ترور ایتیلیشی، خبرچیلرگه قرشی زوروانلیکلر عامل‌لری حکومت تامانیدن تعقیب قیلینمه‌سلیگی، افراطیت کوپه‌یشی و خبر ییتکزیش گه حکومت تامانیدن چیکلاو یره‌تیلیشی، خبرچیلیک و رسانه‌لرگه قرشی کتته قیینچلیکلردن دیر.
جناب نظری نینگ ایتیشیچه، جاری ییل ده مملکتده ۹ رسانه اعضاسی اولدیریلگنی گه علاوه، رسانه ایشلاوچی‌لریدن ۹۰ ته‌سی اینیقسه عیاللر امنیتی تهدیدلر، سیاسی باسیم‌لر و رسانه‌لرنینگ مالی وضعیتی خراب بولگنی باعث یالغیز غرب زونیده خبرچیلیکدن قول تارتیشگن.
هرات ده بیلیم‌یورت استادی و خبرچی فیصل کریمی، جاری ییل نی خبرچیلرگه قرشی قیین بیر ییل دیب ایتیشیچه، خبرچیلرگه قرشی زوروانلیکلر و ریجه‌لنگن ترورلر اوزگریشی، مذهبی افراطی گروه‌لر کوپه‌یشی و معلومات گه قول تاپیش خصوصیده حکومت تامانیدن چیکلاو یره‌تیلیشی مملکتده خبرچیلیک نی جدی تهدید گه دوچ قیلگن.
شونینگدیک هرات ده خبرچی‌لردن قطاری جاری ییل نی خبرچیلیک اوچون قیین بیر ییل دیب آگاه‌لنتیریش‌لریچه، بو وضعیت دوام تاپگن صورتده، قویاش ۱۴۰۰- ییل ده خبرچی‌لردن کوپینچه‌سی خبرچیلیکدن قول تارتیش گه زورلنه‌دی.
خبرچیلر و رسانه‌لردن حمایت قیلووچی نهادلر قویاش ۱۴۰۰- ییل ده خبرچیلر اولدیریلگنی عامل‌لری تانیلیب و محکمه قیلینیشی و شونینگدیک معلومات ییتکزیش خصوصیده‌گی چیکلاولر حکومت تامانیدن قویی کیلیشی حقیده امید بیلدیرگن.
