بوگون (شنبه،۲۷حوت) خبرچیلر ملی کونی گه ماس دیر. ایشلرینی قولدن بیریب و یامان وضعیتده قرار تاپگن خبرچیلردن قطاری نینگ ایتیشلریچه، حاضر ایسه روحی و اقتصادی قیین احوال ده حیات کیچیرماقدهلر.
قریب سکیز آی آلدین تصویری میدیالردن بیریده ایشینی قولدن بیرگن مریم اکبری نینگ ایتیشیچه، نیچه مرته تورلی خیل میدیالر گه ایش اوچون باش اورگن؛ بیراق میدیالرده عیاللر گه یرهتیلگن چیکلاولر سبب، اوشبو میدیالر تامانیدن قبول بولمهگن.
بیزلرنینگ فیسبوک صحیفهمیزگه باش اورینگ!
کرایی اوی ده حیات کیچیریب کیلهیاتگن مریم نینگ ایتیشیچه: «مین بیر ایش تاپیب، عایله خرهجتینی تامینلب و آتم گه یاردم بیریش اوچون کوپ سعی و حرکت قیلدیم، بیراق ایشیم نی قولدن بیردیم و بو وضعیت مینی اوچون کوپ قیین دیر. روحی کسللیککه روپهره بولدیم. بیر آی دن کوپراق روانشناس یانیگه باردیم. مین قیز بولگنیم اوچون درس اوقیهآلمهیمن و ایش قیله آلمهیمین.»
شوندهی بیرحالده، ایشسیز بولگن خبرچیلردن باشقه بیری فریبا هاشمی نینگ ایتیشیچه، او عایلهسی نینگ سرپرستی ایکن و ایشینی قولدن بیریش بیلن، روحی و اقتصادی قیینچیلیکلر بیلن روپهره بولگن.
اوچ ییل خصوصی رادیولردن بیری نینگ اجتماعی دستورلریده ایشلهگن فریبا نینگ ایتیشیچه: «مین ایشلهیدیگن میدیاده هر کون ینه بیر چیکلاو وضع بولر ایدی که، میدیامیز باغلندی و اوندن کیین، نیچه میدیا گه ایش اوچون باش اوردیم، بیراق وضع بولگن قیینچیلیکلر سبب، قیز ایشلاوچی آلمسلیکلرینی ایتدیلر.»
لیکن مدیاسیدهگی قیینچیلیکلر سبب، تورت آی آلدین ایشینی قولدن بیرگن خبرچیلردن بیری کاظمی نینگ ایتیشیچه، میدیا ایشلریدن اوزاق بولگنی سب، رسانهیی فعالیتلر گه انگیزه و علاقهسینی قولدن بیریب و باشقه بیر ایش گه یوز کیلیتیرگن.
بیزلرنینگ توییترده هم تعقیب قیلینگ!
قریب تورت ییل خبرچیلیک قیلگن کاظمی نینگ کوپهیتیریشیچه: «ایش قیلیشیم پیتده، کوپینچه قیینچیلیکلر بیلن روپهره ایدیک. جانیمیز برابریدهگی تهدید دن باشلب چیکلاولرگچه، بیراق ینه هم ایش قیلر ایدیک؛ لیکن حاضر ایسه ایشسیز بولگنمن. حاضر ایسه اینگ بویوک قیینچیلیگیمیز نامناسب اقتصاد دیر.»
عین حالده، افغانستان ایرکین میدیالریدن حمایت قیلووچی نهاد (نی)، افغانستان ده میدیالر برابریدهگی قیینچیلیکلردن خواطر بیلدیریب، خبرچیلر و میدیالر ایشی یامانلنیشی و میدیالر یاپیلیشی سبب یوزلرچه خبرچی نینگ ایشسیز بولگنی نی بیان قیلگن.