سلاموطندارنینگ مملکت ۱۱ ولایتیده ۲۵ یاش بیلن صحبت نتیجهلری شونی کورستهدی کی، اولرنینگ کوپچیلیگی آنلاین پلتفرمهلر و مارکتینگ کمپنیهلریگه سرمایه کیریتگچ، وعده قیلینگن فایدهنی آلالمسدن سرمایهلرینینگ بیر قسمینی یا کی همهسینی قولدن بیرگنلر.
مارکتینگ نتورک، تجاری فعالیت توری بولیب اونده آدملر نهفقط محصولات ساتیش آرقهلی بلکی ینگی اعضالرینی جلب قیلیش آرقهلی هم درآمد آلیشهدی. بیراق ایریم متخصصلرنینگ فکریچه، بوندهی دستورلرنینگ بعضیلری کوپراق واقعی محصولات سوداسیدن کوره آدملرنی و مبلغلرنی جلب قیلیشگه تینهدی. بو ایسه شفافلیک و نظارت بولمسلیگی سببلی سرمایهنینگ یوقالیش خوفینی آشیرهدی.
اوشبو گزارشده کابل، کنر، کاپیسا، قندوز، بادغیس، بغلان، فاریاب، هرات، هلمند، جوزجان و پنجشیر ولایتلریدن ۱۷ ایرکک و ۸ عیال شامل ۲۵ یاش بیلن صحبت قیلینگن. اولردن ۱۶ نفری «یونیک فاینانس» و «گولدبیس» کبی آنلاین سرمایه کیریتیش پلتفرمهلرده سرمایه کیریتگن و ۹ نفری ایسه «پنبهریز» و «لدورا» کبی مارکتینگ نتورک کمپنیهلرده فعالیت یوریتگن.
معلوماتلر شونی کورستهدی کی اوشبو کیشیلر ۲۰ مینگ افغانیدن بیر مینگ ۷۰۰ دالر گچه سرمایه کیریتگن. گزارشده صحبت قیلگنلرنینگ ایتیشیچه، بازار یوقلیگی، تازه کیشیلرنی جذب قیلیش گه قوربی ییتمسلیک و اوشبو دستورلرنینگ ناانیق توری مالی ضرر کوریش و فایده قیلمسلیک اساسی سببی دییلگن.
ایشانچ توزاقلری و تیز درآمد وعدهلری
هراتلیک ۳۴ یاشلی زهره، اقتصادی قیینچیلیک و تیز درآمد قیلیش وعدهسی بیریلگنی سببلی بو ایشنی باشلهگن. او شوندهی دییدی: «کیریشیمدن اساسی مقصد اقتصادی قیینچیلیک ایدی. بو ایشنی تیز درآمدی بار و اویده بولیب درآمد کیلیشینی ایتدیلر. چونکی اویلی من و اوی مسئولیتلری مینی زمهمگه، بوندهی ایش مین اوچون مناسب کوریندی.»
کنرلیک ۳۰ یاشلی شیرشاه گه کوره، اقتصادی احوالی اوزگریشی و تیز درآمد قیلیش اوچون بو ایشنی باشلهگن؛ بیراق نهایت مالیهوی نقصان کورگن. او شوندهی دییدی: «تیز درآمد قیلیب و اقتصادی احوالیم اوزگریشنی خواهلردیم؛ بیراق خطا قیلگنیمنی بیلدیم.»
جوزجانلیک ۳۰ یاشلی احمدرشاد، قرینداشلریدن بیرینینگ ترغیبی بیلن بیر مینگ ۷۰۰ امریکالیک دالر آنلاین پلتفرمده سرمایه کیریتگن، قیسقه مدت اوتگچ بوتون سرمایهسینی قولدن بیرگن.
اونینگ کوپهیتیریشیچه: «ابهمنینگ اوغلی بلجیمده یشهیدی، مینی اوشبو سایت گه سرمایه کیریتیش گه ترغیب قیلدی، هر آی ۳۰۰-۴۰۰ دالر فایده قیلهسنگ. مین اونگه ایشانیب سرمایه کیریتدیم؛ بیراق بیر آی اوتگنیدن سونگ بوتون پوللریم توسیلیب و کمپنیه یوقالدی.»
پنجشیر یشاوچیسی ۳۲ یاشلی عنایتالله، مارکتینگ کمپنیهلریدن بیریده بیر ییل فعالیت قیلگنیدن سونگ، توارلرنی ساته آلمسلیک و ایش تیمینی تشکیل ایته آلمسلیگی سببلی ایشنی قویبارگن. او شوندهی دییدی: «مین بو ایشگه اورتاقلریمدن بیرینینگ ترغیبی سببلی کیردیم باشلهگندن کیین، آنلاین سمینارلر اوتکزدیلر؛ بیراق محصولات قیمت ایدی و اولرنی ساتیشگه موفق بولمهدیم، نهایت فایده اورنیگه ضرر قیلدیم.»
حقوقی کفالت بولمسلیک قیینچیلیگی
گزارشده صحبت قیلگن ۱۶ نفر یاش، اولرنینگ برچهسی مارکتینگ و آنلاین سرمایه کیریتیش دستوریده فعالیت قیلگنلر، رسمی شرطنامهلر امضالنمسلیگی و حقوقی کفالت یوقلیگی سببلی سرمایهلرینی یوقاتگنلرینی ایتهدیلر، اولر انیق منزل یوقلیگی و اوشبو دستورلر مسئوللرینینگ جوابگر بولمسلیگی سببلی، قولدن بیرگن سرمایهلرینی آلیشه آلمهگن.
هراتلیک ۲۸ یاشلی احمد شوندهی دییدی: «پولیمنینگ بیر قسمینی آلیشگه سعی-حرکت قیلدیم، بیراق موفق بولمهدیم؛ چونکی هیچ قنقه رسمی شرطنامه امضالنمهگن ایدی و قانونی حجتیم هم یوق ایدی.»
بادغیس یشاوچیسی ۲۵ یاشلی میرویس شوندهی دییدی: «دستور مسئوللرینی تانیمسدیم. فقط بیر پیام بیروچی بیر صفحه بار ایدی – هیچ کیم جواب قیترمسدی. فکریمچه ربات ایدی. هیچ قنقه رسمی حجت یوق ایدی و هیچ نرسه قیله آلمهدیک.»
کمپنیهلر نیمه دییدی؟
عکسینچه، اوشبو ساحهده فعالیت یوریتهیاتگن بعضی کمپنیهلرنینگ ایتیشلریچه، قانونی فعالیت یوریتیب و ثبت بولگنلر و بعضی کیشیلر حقیقی درآمدلرنی ساتیش آرقهلی درآمد قیلهدی.
کابلده «پنبهریز» کمپنیه نمایندهلیکلریدن بیرینینگ مسئولی عبدالبصیر غفوری، بو کمپنیه رسمی شکلده فعالیت قیلیب و جوازی بارلیگینی بیلدیرهدی او شوندهی دییدی: «بیز ایکی بولیمده فعالیت یوریتهمیز؛ محصولاتنی ساتیش و تیم تشکیل ایتیش. ساتیش فعال درآمد دیر و تیم تشکیل ایتیش غیرفعال درآمد. آدملر گه معلومات بیریلهدی اگر محصول ساتیلمسه اونی اوزلری قوللنه آلهدیلر.»
ایشسیزلیک و ترغیبات؛ یاشلرنی جلب ایتووچی ایکی اساسی عامل
اقتصاد شناسلرنینگ فکریچه، ایشسیزلر سانی کوپهیشی، ایش امکانیتلری آزلیگی و اجتماعی ترماقلرده کینگ کولملی ترغیباتلر، یاشلرنینگ بو ایشگه یوز کیلتیریش یگانه عاملی دییلهدی.
اقتصاد شناس شاکر یعقوبی و ایرج فقیری، یاشلر مالیهوی ضرر کورمسلیگی اوچون ایش امکانیتلری یرهتیلیشی، کیچیک تشبثلر قوللب-قوتلنیشی و شفاف قاعدهلر یرهتیلیشی ضرورلیگینی تأکیدلهیدیلر.
اولرنینگ فکریچه، حکومت و مسئول نهادلر حقیقی ایش امکانیتلرینی یرهتیش، کیچیک تشبثلرنی قوللب-قوتلش، تخنیکی و مسلکی کونیکمهلرنی اورگهتیش گه دقت قیلیشی کیرهک.
اولرنینگ ایتیشیچه: کوپلب آدملر اقتصادی برقرارلیک یوقلیگی و دیجیتال سودالری حقیده ییترلی معلوماتی بولمسلیکلری سببلی، باشیده آزگینه فایده کوریشلری ممکن، بیراق کیینچهلیک آغیر ضررلر بیلن یوزلشهدیلر.
اقتصادی باسیملردن تارتیب ریکلام و هیجانلی ترغیباتلر توزاغیگه توشیشگچه
جمعیت شناسلر، اقتصادی باسیم، ایشسیزلیک و عایلهوی قیینچیلیک سببلی کوپلب یاشلر مارکتینگ فعالیتلر گه یوز کیلتیریش گه مجبور بولگنینی ایتهدیلر.
جمعیت شناس شعیب احمدی شوندهی دییدی: «اقتصادی باسیملر و عایلهوی قیینچیلیکلر سببلی یاشلر بوندهی ایشلر گه یوز کیلتیرهدی. یالغان ترغیبات و باشقهلرنینگ موفقیتلی بولگن حکایهلری اولرنی بو ایشگه ترغیب قیلهدی.»
روانشناسلرنینگ فکریگه کوره، یاشلرنینگ «تیزدرآمد» قیلیش وعدهلریگه جلب قیلینیشی کوپراق اقتصادی ایمس، بلکی روانشناسلیک حادثه دیر؛ چونکی بوندهی تیزیملر آدملرنینگ حسیاتلری و میه خطالریگه تینهدی.
روانشناس نصرتالله فروتن شوندهی دییدی: «موفقیتسیزلیکدن سونگ آدملر اوز قدر-قیمتینینگ پسهیشی، مالیهوی خواطر، اویت حسی و یالغیزلیک کبی جدی روحی معمالر گه دوچ کیلیشهدی؛ اینیقسه اگر اولر باشقهلرنی هم بو دستورلر گه جلب قیلگن بولسهلر.»
سلاموطندار، مارکتینگ کمپنیهلر و آنلاین پلتفرمهلر فعالیتی بارهسیده صناعت و سودا وزیرلیگی همده مخابرات و تکنالوژی معلوماتی وزیرلیگینینگ فکر-ملاحظهسینی اورگهنیش اوچون تلاش قیلدی؛ بیراق کیتمه-کیت تلاشلر بیلن اوشبو گزارش نشر بولگونچه اولر تامانیدن جواب قیتریلمهدی.
شو بیلن بیرگه، بیلرمانلرنینگ آگاهلنتیریشیچه، ثمرهلی نظارت بولمسلیک، اهالینینگ ییترلی درجهده خبردار ایمسلیگی و اجتماعی ترماقلردهگی کینگ کولملی ترغیباتی بوندهی خوفلی فعالیتلرنینگ کینگهیشیگه شرایط یرهتگن؛ اولرنینگ فکریچه، بو مسئله مسئول ادارهلرنینگ جدی اعتبارینی همده انیق نظارت معیارلرینی ایشلب چیقیشنی طلب قیلهدی.
