ننگرهار ولایتیده زیتون‌نی قیته ایشلش ساحه‌سیده فعالیت یوریته‌یاتگن ایریم اهالی وکیللری‌نینگ ایتیشیچه، اوشبو ساحه گه سرمایه کیریتیش باشقه فقرالر اوچون هم ایش اورینلری و درآمد آلیش امکانیت‌لرینی یره‌تیشی ممکن.
ننگرهار ولایتی یشاوچیسی بولگن ۲۵ یاشلی عبدالحق، بیش ییل اول ۲۰۰ مینگ افغانی سرمایه بیلن زیتون یاغی ایشلب چیقریش فعالیتینی باشله‌گنینی و استه-سیکین ینه بیر نیچه کیشینی ایش بیلن تأمینله‌گنینی بیلدیره‌دی. او شونده‌ی دییدی: «مقصدیم – شو آرقه‌لی درآمدیمنی آشیریش و عایله‌م خره‌جت‌لرینی قاپلشگه حصه قوشیش. حکومتدن زیتون‌نی قیته ایشلش اوچون مناسب بازار یره‌تیش، مالیه‌وی قوللب-قوتلش و ضرور اوسکونه‌لر بیلن تأمینلش باره‌سیده بیز بیلن همکارلیک قیلیش‌لرینی سوره‌یمن.»
ننگرهارلیک ینه بیر فقرا ۳۱ یاشلی عمر ایسه بیش ییلدن بیری زیتون صناعتیده فعالیت یوریته‌یاتگنینی ایتیب، زیتون یاغی و زیتون دانه‌لرینی ساتیشدن تاپگن درآمدی آرقه‌لی کونده‌لیک احتیاجلرینی قاپلب کیله‌یاتگنینی بیلدیره‌دی. اونینگ ایتیشیچه: «کیچیک بیر دکان‌ده زیتون یاغی و زیتون دانه‌لرینی ساته‌من. بو ایشنی ۳۰ مینگ افغانی بیلن باشله‌گنمن و سرمایه‌م کوندن-کونگه آشیب بارماقده. عایله‌میز خره‌جت‌لری و کونده‌لیک احتیاج‌لریمیزنی شو یول آرقه‌لی تأمینله‌یمیز.»
ننگرهار ولایتی یشاوچیسی بلال توحیدی، تورت ییل اول زیتون ساحه‌سیده فعالیتینی ۵۰ مینگ افغانی سرمایه بیلن باشله‌گنینی و حاضرده درآمدی ۲۵۰ مینگ افغانی گه ییتگنینی بیلدیره‌دی. او شونده‌ی دییدی: «بیز زیتون یاغی‌میز و اونی ییغیش، تازه‌لش همده قداقلش بیلن شغللنه‌میز. بو ایشنی ۵۰ مینگ افغانی بیلن باشله‌گن ایدیک، حاضر ایسه درآمدیمیز قریب ۲۵۰ مینگ افغانی گه ییتگن.»
باشقه تاماندن، ننگرهار ولایتی زراعت وادی دولت کمپنیه‌سی سوزلاوچیسی سیدهمایون غریب‌مل‌نینگ ایتیشیچه، اوشبو ولایتده زیتون حاصلی آشیب بارماقده. اونینگ سوزلریگه کوره، اوتگن ییلی قریب بیرمینگ ۳۰۰ تُن زیتون ییغیب آلینگن و جاری ییلده بو کورستکیچ بیر مینگ ۵۰۰ تُن گه ییتیشی کوتیله‌دی. او شونده‌ی دییدی: «زیتون یاغینی قیته ایشلش اوچون کتته ایشخانه‌میز بار و اونینگ مملکت ایچیده هم، خارج‌ده هم مجازلری بار. زیتون ییغیب آلینگندن و اوندن توزلمه تیارلنگندن سونگ، زیتون یاغی ایشلب چیقریش باسقیچی باشلنه‌دی. بو جریان‌نینگ اوزی‌ده هم کوپلب آدملر اوچون ایش اورینلری یره‌تیله‌دی.»
شو بیلن بیرگه، اقتصادشناس همت خان‌نینگ ایتیشیچه، زیتون صناعتیگه سرمایه کیریتیشنی کوپه‌یتیریش و اونی قوللب-قوتلش عایله‌لر اقتصادیاتی‌نینگ رواجلنیشی همده ینگی ایش اورینلری یره‌تیلیشیگه یاردم بیریشی ممکن. اونگه کوره: «اگر سرمایه کیریتیش کوپه‌یتیریلسه، نه‌فقط یاشلر اوچون ایش امکانیت‌لری یره‌تیله‌دی، بلکی مملکت اقتصادیاتی هم مستحکم‌لنه‌دی. زیتون صناعتینی رواجلنتیریش اوچون زمانه‌وی اوسکونه‌لرنی آلیب کیریش، بازارده تیگیشلی ترغیبات و خبردارلیک ایشلرینی آلیب باریش همده زیتون‌نی خارجی بازارلر گه چیقریش اوچون ضرور شرایط‌لرنی یره‌تیش کیره‌ک.»
زیتون صناعتیده فعالیت یوریته‌یاتگنلرنینگ ایتیشیچه، زیتون‌نی قیته ایشلش، مارکیتینگ، سرمایه کیریتیش و صادر قیلیش ساحه‌لریده کوپراق قوله‌یلیکلر یره‌تیلسه، نه‌فقط اهالی‌نینگ درآمدی آشه‌دی، بلکی یاشلر اوچون هم کوپراق ایش امکانیت‌لری یره‌تیله‌دی.
