سلاموطندارنینگ ۲۰ نفر قیز و ۱۰ نفر ییگیتدن عبارت ۳۰ نفر یاش بیلن صحبت نتیجهسی شونی کورستهدی کی، عملی کونیکمه (مهارت)لرنی بیلیش دیپلومدن تشقری ایش تنلشده مهم رولی بار. کمپیوتر و انگلیس تیلی کبی عملی مهارتلرنی اورگنگن یاشلر کوپراق شو ساحهلر گه عاید ایشلرده بند. عکسینچه، عملی مهارتلرنی بیلمهیدیگن یاشلر کوپینچه اوز متخصصلیگیگه باغلیق بولمهگن ایشلرده فعالیت یوریتماقده.
گزارشده صحبت قیلگنلردن ۱۷ نفری، لیسانس دیپلومی بولیشی بیلن بیرگه عملی مهارتلرنی هم اورگنگن؛ بیراق قالگن ۱۳ نفری فقط بیلیم یورتدهگی نظری تعلیم بیلن چیکلنیب، ناقولی ایش شرایطیده قالگن.
کابللیک ۲۸ یاشلی احمدفهیم، اداره و مدیریت بولیمینی اوقیگن ایتیشیچه، کمپیوتر برنامهلرینی اورگهنیش اونینگ ایش یولینی اوزگرتیرگن. او شوندهی دییدی: «بیلیم یورتدن کیین ینگی مهارتلرنی اورگندیم؛ سببی شو کی بیلدیم وظیفه تاپیش و کوپ درآمد قیلیش اوچون کوپراق مهارتنی بیلیب و اوزیمنی ایش بازاری احتیاجلریگه ماسلشتیریشیم کیرهک.»
قندوز یشاوچیسی ۲۷ یاشلی بشرا گه کوره، کمپیوتر و علاقه قوریش مهارتلرینی اورگهنیش، ایشیگه قولیلیک آلیب کیلگن. اونینگ ایتیشیچه: «علاقه قوریش و تکنالوژی بیلن ایشلش مهارتلرینی اورگندیم؛ چونکی اوقیتیش بولیمیده اوقووچیلر بیلن علاقه قوریشده ینگی واسطهلردن قوللنیش جوده مهم دیر. علاقه قوریش مهارتی، وقتنی باشقریش، انگلیس تیلی و دیجیتال سوادی اینگ مهم مهارتلردن حسابلنهدی.»
عملی مهارتی بولمهگن یاشلر، کوپراق تحصیللر گه باغلیق بولمهگن ایشلر بیلن بند بولهدی.
کابللیک ۳۵ یاشلی احمدفرید، کمپیوتر ساینس بولیمینی بیتتیرگن ایتیشیچه، ایش بازاریگه ماس مهارتنی بیلمسلیگی سببلی، ایندی دکاندارچیلیک قیلیش گه مجبور بولگن. او شوندهی دییدی: «باشقه مهارتلرنی بیلسم ایدی؛ ایندی دکاندارچیلیک قیلماقده من و هیچ قندهی مهارتنی بیلمهی من.»
عملی مهارتنی بیلمهگن و لیسانس دیپلومی بولگن ۱۳ نفر یاش، اقتصادی قیینچیلیک، انیق ریجهلری یوقلیگی، وقت ییتیشمسلیک و انگیزهسیزلیکنی، عملی مهارتنی اورگنه آلمسلیک عامللردن اتهیدیلر.
کابل یشاوچیسی ۲۳ یاشلی جمال، کمپیوتر ساینس بولیمینی بیتتیرگن ایتیشیچه: «اقتصادی قیینچیلیک، انگیزهسیزلیک و کیلهجککه دایر ناامیدلیک، ینگی مهارتلرنی اورگهنیشگه مانع بولگن عامللردن دیر؛ ینگی مهارتلرنی اورگهنیش اوچون انگیزهم ضعیف ایدی.»
کابل یشاوچیلریدن باشقه بیری ۲۶ یاشلی اسما، بیلیم یورتلردن بیرینینگ تیل و ادبیات فاکولتهسینی بیتتیرگن شوندهی دییدی: «وقت ییتیشمسلیگی و انگیزه یوقلیگی، باشقه مهارتلرنی اورگنه آلمسلیگیم گه سبب بولدی؛ انگیزه بولسه اورگنردیم.»
اداره و پالیسی عامه بیلرمانی سردارمحمد ساعی، یاشلر آرهسیده بیکارچیلیکنی کمهیتیریش اوچون دولت سیاستی و نادولتی نهادلرنینگ عملی فعالیتلری اورتهسیده هماهنگلیک ایجاد بولیب و عملی تعلیملر بیریلیشی کیرهک دییدی: «عملی درسلر تکراری درس اورنیده جایلشتیریلیشی کیرهک؛ اورگهنیش طلبهلر اوچون جبری قیلینسین؛ رادیو-تلویزیون آرقهلی مدنیت سازلیک بولسین.»
باشقه تاماندن، بیلیم یورت استادی احمدرشاد عظیمی، بیلیمدن کوره ینگی کونیکمهلرنی اورگهنیشگه تأکید ایتهدی. اونینگ کوپهیتیریشیچه، طلبهلر تحصیل یانیده، یخشی ایش امکانیتلرنی تاپیش اوچون عملی مهارتلرنی اورگنیشلری کیرهک. او شوندهی دییدی: «اگر طلبهلر اوقیش جریانیده اوزلری اوچون شوندهی امکانیتلر یرهتسهلر کی درس بیلن بیرگه تورلی ساحهلرده ضرور و عملی کونیکمهلرنی هم اورگنسهلر، بو کیلهجکده بیلیم یورتنی بیتتیرگندن سونگ ایش برقرارلیگینی تأمینلشی ممکن.»
اقتصادشناس احمدولی سازش، ایش بازاری احتیاجلریگه ماس و تکنالوژیلر بیلن همقدم بولگن کونیکمهلر یاشلر بندلیگیده مهم رول اوینهیدی. اونینگ ایتیشیچه: «یاشلر آرهسیده کونیکمهلرنینگ ییتیشمسلیگی اوزاق مدتده مملکت اقتصادیاتیگه سلبی تأثیر کورسهتیشی ممکن؛ چونکی ایش بازاری احتیاجلریگه ماس حرکت قیلینمسه، رقابتده یوتقزیب قوییلهدی.»
بیرلشگن ملتلر تشکیلاتی ۱۵ جولاینی یاشلر ملَکهلری بوییچه خلقارا کونی دیب بیلگیلهگن. اوشبو تشکیلات باش کاتبی آنتونیو گوترش، قویاش ۱۴۰۳ ییلده یاشلرنی کوچهیتیریش اوچون تعلیم و ملَکه آشیریشنینگ مهملیگینی تأکیدلهگن ایدی.
