گزارش‌لر اساسیده، ایران حکومتی ینگی‌لیکده اوشبو مملکت نینگ شیراز، کرمان‌شاه، بوشهر، مشهد، کاشان و اصفهان شهر‌لریده، قانونی و ناقانونی افغان مهاجرلر گه ایش خصوصیده چیکلاولر نی یره‌تیب و افغان مهاجرلر نینگ چیقریش بیلن اولر گه باسیم‌لر نی کوچه‌یتیرگن.
افغان مهاجرلردن قطاری نینگ ایتیشلریچه، اولر گه یالغیز آغیر ایشلر نینگ انجام بیریلیشی گه رخصت بیریلگن و دکان‌لرده ایشله‌یشلری خصوصیده رخصت بیریلمه‌گن، شونینگدیک ایران پولیسی تامانیدن حجت‌لی بولگن مهاجرلر هم قولگه آلینه‌دی.
۴۰ ییل‌دن بیری شیراز شهری‌ده حیات کیچیره‌دیگن نصرالله نینگ سلام‌وطندار گه ایتیشیچه، ینگی‌لیکده دکانی یاپیلیب و دکانی نی قیته آچگنی صورتده، چیقریلیشی یا-ده جریمه بولیشی توغریسیده آگاه‌لنتیریلگن.
بیزلرنینگ توییترده هم تعقیب قیلینگ!
مذکور افغان مهاجر نینگ کوپه‌یتیریشیچه: «بونچه ییل نینگ اوتگنی بیلن، دکان‌لریمیز نی یاپدیلر و دکان‌ده ایشلش گه رخصت بیریلمه‌یدی، باغ‌دارلیک، تاووق‌‌چیلیک، سیگیر‌چیلیک و… ایشلاوچیلیک قیلینگ دیدیلر.»
نصرالله گه کوره، او ییل‌لردن بیری قانونی شکلده ایران ده حیات کیچیره‌دی؛ بیراق حاضر ایسه آزاد ایش قیلیش حقی نی اوندن آلگنلر.
شونینگدیک ایران نینگ فارس ولایتی‌ده حیات کیچیره‌دیگن افغان مهاجرلردن باشقه بیری ولید نینگ ایتیشیچه، قانونی مهاجرلر هم تورلی‌خیل بهانه‌لر بیلن قولگه آلینیب و تیکشیروو آستیده قرار تاپه‌دی.
اونینگ کوپه‌یتیریشیچه: «فارس ولایتی مسئوللری ناقانونی قراری نی قبول قیلگنلر، مهاجرلر نی جنایتچی کبی قولگه آلیب و اردوگاه‌لر گه انتقال بیردیلر. شونینگدیک برچه‌دن باشقه بیر مرته دکان‌دارلیک قیلگنلری صورتده آغیر جریمه بولیش‌لری خصوصیده سوز آلدیلر.»
شونده‌ی بیرحالده، ناقانونی شکلده ایران ده حیات کیچیره‌دیگن مهاجرلردن قطاری نینگ ایتیشلریچه، اولر قولگه آلینیش‌دن قورقیش اوچون، یاشرینچی شکلده ایشله‌یدیلر و کوپینچه پیت حقلری هم توللنیلمه‌یدی.
اصفهان شهری‌ده‌گی افغان مهاجرلردن بیری عارف نینگ ایتیشیچه، ایران ده‌گی افغان مهاجرلر نینگ وضعیتی جوده‌یم یامان دیر و اولر قولگه آلینیش‌دن قوریش اوچون حتی نانوی‌خانه گه هم باره آلمه‌یدیلر.
ایران ده‌گی افغان مهاجرلر نینگ کوپه‌یتیریشلریچه، هیرمند دریاسی سووی خصوصیده ایران و افغانستان آره‌سیده‌گی جنجل‌لردن کیین، افغان مهاجرلر خصوصیده ایران دولتی نینگ باسیم‌لری کوپه‌یگن دیر.
عین حالده، مهاجرلر و باش پناه ایزلاوچیلر وزیرلیگی مسئوللری نینگ ایتیشلریچه، اولر ایران رسمی‌لری بیلن اوچره‌شگنلریدن کیین، اولردن افغان مهاجرلر مسئله‌سی نینگ سیاسی قیلمه‌سلیک‌لری نی ایسته‌گنلر.
بیزلرنینگ فیسبوک صحیفه‌میزگه باش اورینگ!
مهاجرلر و باش پناه ایزلاوچیلر وزیرلیگی سوزلاوچیسی عبدالمطلب حقانی نینگ ایتیشیچه، اوتگن بیر آی‌ده، ۱۴ مینگ مهاجر جبری شکلده ایران دن چیقریلگن دیر.
اونینگ کوپه‌یتیریشیچه: «اوتگن بیر آی‌ده، ایران دن قریب ۲۶ مینگ‌دن آرتیق کیشی مملکت گه قیتگن که، اولردن ۱۲ مینگ‌دن آرتیغی اوز ایسته‌کلری و قالگنی ایسه مذکور مملکت‌دن چیقریلگن دیر.»
ایتیش کیره‌ک که، ایران دن قیتگن مهاجرلر، افغانستان ده هم نابیللی کیله‌جک‌دن شکایت قیلیب ایتیشلریچه، مملکت‌ده هم ایش زمینه‌سی یره‌تیلمه‌گن و حکومت بو توغریده توجه‌سیز دیر.
