اسلام امیرلیگی مدافعه وزیرلیگی، نورستان ولایتی کامدیش تومنیده امنیتی و مدافعه کوچلرنینگ عملیاتی یکونلنگنیدن خبر بیردی. اوشبو وزیرلیکنینگ ایتیشیچه، بو عملیات پاکستان همکارلیگی بیلن دیورند چیزیغی آرقهلی افغانستان گه کیرگن عصیانچی گروهلر گه قرشی اوتکزیلگن.
مدافعه وزیرلیگی سوزلاوچیسی صدیقالله نصرتنینگ ایتیشیچه، عملیات دوامیده داعش گروهلرینینگ ۴۱ نفر جنگریسی شونینگدیک فتنهچیلر دیب اتهلگن شخصلر اولدیریلگن، ینه ۶۲ کیشی حبس گه آلینگن.
اونینگ کوپهیتیریشیچه، امنیتی کوچلر افغانستان توپراغیدن مملکت ایچیده بیقرارلیک کیلتیریب چیقریش اوچون فایدهلنیلیشی گه یول قویمهیدی و بو بارهدهگی هر قندهی اورینیشگه قرشی چارهلر کوریلهدی. او شوندهی دییدی: «افغانستان امنیتی و مدافعه کوچلرینینگ نورستان ولایتی کامدیش تومنیده پاکستان حربی رژیمی بیلن همکارلیکده دیورند چیزیغیدن اوتیب، نورستان گه کیرگن یاووزلیک و فتنهچی گروهلرگه قرشی عملیاتلری یکونلندی. اوشبو عملیات دوامیده ۴۱ نفر داعش جنگریسی اولیب و ینه ۶۲ نفری حبس گه آلینگن.»
بو بیاناتلر، کابل و اسلامآباد اورتهسیدهگی مناسبتلر سونگی آیلرده خوفسیزلیک و سیاسی کیسکینلیکلر بیلن کیچهیاتگن بیر پیتده بیلدیریلماقده.
حربی مسئلهلر بوییچه تحلیلچیلر آگاهلنتیریب، اوشبو کیسکینلیکلرنینگ دوام ایتیشی قوراللی گروهلر فعالیتینینگ کوچهیشیگه، چیگرهلر خوفسیزلیک معمالرینینگ یوزه گه کیلیشی گه و منطقهده بیقرارلیکنینگ کوچهیشیگه آلیب کیلیشی ممکنلیگینی ایتهدیلر.
حربی بیلرمان صادق شینواری شوندهی دییدی: «اگر بو وضعیت نظارت گه آلینمسه، قوراللی گروهلر فعالیتینینگ کینگهیشی، سودا یوللرینینگ یاپیلیشی و منطقهده بیقرارلیکنینگ کوچهیشی خوفی یوزه گه کیلهدی. برقرار ییچیم ایسه حربی کیسکینلیکنی کوچهیتیریش ایمس، بلکی توغریدن-توغری ملاقات، چیگره خوفسیزلیگینی مستحکملش و قوراللی گروهلر گه قرشی قوشمه همکارلیکنی یولگه قوییشدن عبارت.»
سیاسی تحلیلچی عبدالصادق حمیدزوی، حاضرگی کیسکینلیکلرنی پاکستاندهگی ایچکی وضعیت بیلن باغلهیدی. اونینگ ایتیشیچه، اسلامآباد ایچکی معمالرینی یشیریش اوچون اوز سیاستیده افغانستاننی ارهلشتیرماقده. او شوندهی دییدی: «بوگون افغانستان و پاکستان اورتهسیدهگی موجود کیسکینلیکلرنینگ برچهسی پاکستاندهگی ایچکی موفقیتسیزلیکلر سببلی یوزه گه کیلهدی. اولر سیاسی، استخبارات و عملیاتلریده موفقیتسیزلیکلرینی آقلش یا کی یشیریش اوچون هیچ قندهی اساس گه ایگه ایمسلر. حاضر هم ایچکی مسئلهلری و سیاستلرینی یوریتیش اوچون افغانستاندن واسطه صفتیده فایدهلنهدیلر.»
سونگی آیلرده کابل و اسلامآباد اورتهسیدهگی خوفسیزلیک بارهسیده کیسکینلیکلر پاکستان طالبلر حرکتی (تیتیپی) اعضالرینینگ افغانستانده بارلیگی همده پاکستان اردوسینینگ افغانستان گه اویوشتیرهیاتگن هجوملری مسئلهسی سبب دوام ایتماقده.
بیراق، اسلام امیرلیگی بیر نیچه بار افغانستان حدودی خوفسیز ایکنینی و هیچ بیر گروه گه باشقه دولتلر گه قرشی فعالیت یوریتیشیگه رخصت بیریلمسلیگینی بیلدیرگن. شونینگدیک، پاکستاندهگی خوفسیزلیک معمالرینی اوشه مملکتنینگ ایچکی مسئلهسی دیب حسابلشینی تأکیدلهگن.
اوتگن هفته، پاکستان کنر، پکتیکا، قندهار، پکتیا و خوست ولایتلریگه هوا هجوملرینی عملگه آشیردی. نتیجهده تورت نفر تینچ اهالی «شهید» بولگن.
