عالی تعلیمنی دوام ایتتیریش اوچون ننگرهار ولایتیگه بارگن ایریم یاشلر، تورر جای و یشش مسئلهسیده تورلی قیینچیلیکلر بیلن دوچ ایکنلریدن شکایت قیلهدی. اولر سلاموطندار بیلن صحبتده ایتیشلریچه، خصوصی یاتاخانهلرنینگ اجاره حقی یوقاری بولیشی بیلن بیرگه، برچه ضرور امکانیتلری یوق؛ بو مسئله تعلیم آلیش جریانلریگه سلبی تأثیر قویگن.
بو یاشلر مسئوللردن، یاتاقخانهلردهگی خذمتلر صفتینی یخشیلشنی همده طلبهلرنینگ اقتصادی احوالینی حساب گه آلگن حالده، اولر اوچون مناسب یشش شرایطلرینی یرهتیشنی سورهیدیلر.
کنر ولایتیدن بولگن نثاراحمد عارفزینینگ ایتیشیچه، او ننگرهار مرکزی جلالآباد شهریده خصوصی جایلردن بیریده یشهیدی و هر آی توقیز مینگ افغانی اجاره حقی همده ۵۰۰ افغانی تازهلش حقی بیرهدی. او اجاره حقینینگ قیمتلیگیدن شکایت قیلیب شوندهی دییدی: «تورر جاییمیزده تازهلیککه یخشی اعتبار قرهتیلگن بولسه-ده، کتابخانه، یخشی وایفای، پارک و سپورت میدانلرینینگ یوقلیگی طلبهلر اوچون مهم احتیاجلردن بیری دیر.»
۲۴ یاشلی صلاحالدین صافی، ننگرهاردهگی خصوصی بیلیم یورتلردن بیریده طب معالجوی یونهلیشینینگ بیشینچی ییلی طلبهسی. او هر آی یاتاقخانه اوچون تورت مینگ افغانی اجاره حقی تولشینی ایتهدی. اونینگ سوزلریگه کوره، اینترنت نرخینینگ قیمتلیگی، مناسب کتابخانهنینگ یوقلیگی و اوقیش اوچون قولی محیطنینگ یوقلیگی طلبهلر تعلیم جریانیگه تأثیر قیلهیاتگن معمالردن دیر.
صافی شوندهی دییدی: «اینترنت نرخینینگ قیمتلیگی و اوندن یخشی فایدهلنه آلمسلیک تعلیم آلیش جریانینی سُست قیلگن. ینه بیر مهم معما – مناسب و خوفسیزلیک کتابخانهنینگ یوقلیگی بولیب، بو بیزنینگ دقتیمیزنی جمعلشیمیز، تعلیم آلیشیمیز و رواجلنیشیمیز گه کتته تأثیر کورستگن. مسئوللردن طلبهلر اوچون ارزان اینترنت، خوفسیز کتابخانه و اوقیش اوچون قولی محیط یرهتیب بیریشلرینی سورهیمیز.»
شونینگدیک، محمدادریس الهام، ننگرهار بیلیم یورتی ژورنالیزم فاکولتهسینینگ سونگی سمستر طلبهسی و اصلی لوگر ولایتیدن بولیب، ایکی ییلدن بویان ننگرهار بیلیم یورتی یقینیدهگی خصوصی یاتاقخانهده یشهیاتگنینی ایتهدی. اونینگ سوزلریگه کوره، یاتاقخانه اجاره حقی طلبهلرنینگ اقتصادی احوالیگه نسبتن یوقاری. او شوندهی دییدی: «خانهمیزنینگ اجاره حقی قریب اوچ مینگ افغانی بولیب، بیر خانه تورت کیشی اوچون نسبتن قولی. اما نرخلر جوده یوقاری. منتظم آشخانه یوق، حمام و برق تیزیمی هم یخشی ایمس، تازهلیککه هم ییترلیچه اعتبار بیریلمهیدی.»
الهام، مسئوللردن خصوصی یاتاقخانهلر اجاره حقینی کمهیتیریش گه اعتبار قرهتیشلرینی سورهیدی.
استاذلر: مناسب یشش جاینینگ یوقلیگی طلبهلر گه روحی باسیم اوتکزیشی ممکن
اریم بیلیم یورتی استاذلری طلبهلرنینگ مناسب و خوفسیز یشش جایی یوقلیگی همده اوی-جای خرهجتلرینینگ یوقاریلیگینی طلبهلرنی روحی باسیمگه دچار قیلیشی یا کی یشش خرهجتلرینی تأمینلش اوچون آغیر جسمانی محنت قیلیشگه مجبور ایتیشی ممکن دییدیلر.
ننگرهار ولایتی اسپینغر بیلیم یورتی اوقیتووچیسی زبیراحمد سلاموطندار بیلن صحبتده ایتیشیچه، ضرور شرایطلرنینگ یوقلیگی طلبهلر دقتینینگ پسهیشیگه و اولرده روحی باسیم تاپیلیشیگه سبب بولیشی ممکن. او شوندهی دییدی: «مناسب شرایط گه ایگه بولمهگن طلبهلر استرس گه دوچ کیلهدی و اوز مقصدلریگه ایریشه آلمهیدی. اجاره حقینینگ یوقاریلیگی هم طلبهلرنی اقتصادی معما گه دچار قیلهدی و اولر تعلیمگه صرفلشلری کیرهک بولگن وقتنی جسمانی محنت گه صرفلهیدی.»
بیراق، ننگرهار بیلیم یورتی یاتاقخانهسی مسئولی عبدالحکیم حقانی گه کوره، حاضرده اوشبو بیلیم یورتی یاتاقخانهسیده قریب ایکی مینگ ۳۰۰ نفر طلبه استقامت قیلهدی و اولرنینگ یشش جایی بیلن باغلیق معمالرنی حل ایتیش بوییچه ایشلر آلیب باریلماقده. اونینگ ایتیشیچه، یاتاقخانهنینگ ینگی بناسی قوریب بیتکزیلگچ، اوندهگی یشش امکانیتی کینگیهدی. کیلهسی ییلده ایسه اوغیل بالهلر یاتاقخانهسینی بویش و تعمیرلش ایشلری ریجهلشتیریلگن.
حقانینینگ کوپهیتیریشیچه، حاضرده یاتاقخانهنینگ حالتی یخشی و طلبهلر گه ضرور خذمتلر کورسهتیلماقده.
طلبهلر، مسئوللردن دولت و خصوصی یاتاقخانهلردهگی خذمتلر صفتینی آشیریشنی، تازهلیک، برق، اینترنت، کتابخانه و باشقه ضرور امکانیتلرنی یخشیلشنی همده طلبهلرنینگ اقتصادی امکانیتلرینی انابت گه آلگن حالده، اولر اوچون مناسب و زمانهوی یشش شرایطلرینی یرهتیشنی سورهیدیلر. اولرنینگ فکریچه، بو اولر گه خاطر جمع و قولی محیطده تعلیم آلیشلرینی یوکونلش امکانینی بیرهدی.
