سلاموطندارنینگ پنجشیر، سرپل، دایکندی، بغلان، کابل و سمنگان ولایتلریده آنه بولگن ۱۸ اوقیتوچی بیلن صحبتی شونی کورستهدی کی، اولرنینگ ۱۳ نفری ریجهلشتیریش، مسئولیتنی تقسیملش و عایله قوللب-قوتلشی آرقهلی اوقیتووچیلیک و آنهلیک اورتهسیده موازنتنی تأمینلهی آلگن، بیراق قالگن ۵ نفری عایله تامانیدن قوللب-قوتلنمسلیکلری و امکانیت یوقلیگی سببلی جدی قیینچیلیکلر بیلن دوچ بولگنلر.
بو اوقیتووچیلرنینگ ایریملری، آنهلیک تجربهسی اولرنینگ درس بیریش اسلوبیگه هم ایجابی تأثیر کورستگنینی ایتگنلر. ۱۸ اوقیتووچیدن ۶ نفری آنهلیک اولر گه اوقووچیلر گه نسبتن مهربانراق و صبرلیراق بولیشگه یاردم بیرگنینی معلوم قیلگنلر.
دایکندیلیک اوقیتووچی ۳۵ یاشلی نجیبه سجادی، وقتنی باشقریش و ایشلرنی تقسیملش آرقهلی آنهلیک و کسبی اورتهسیده موازنت یرهتیشگه موفق بولگنینی ایتهدی. او شوندهی دییدی: «ایش کوپ، بیراق وقتیمنی باشقرهمن. ایشلرنی تقسیملش آرقهلی آنهلیک تجربهمدن اوقیتووچیلیک مسئولیتیمده ثمرهلی فایدهلنه من. هر دایم شوندهی قیلهمن کی نه اوقووچیلریم و نه فرزندلریم اوچون قیینچیلیک یوزه گه کیلسین.»
دایکندیده اوقیتووچیلردن باشقه بیری ۳۷ یاشلی بختاور دانشور، انیق ریجهلشتیریش و عایله قوللب-قوتلشی آرقهلی آنهلیک و اوقیتووچیلیک وظیفهلرینی اینگ یخشی طرزده بجره آلگن.
اونینگ ایتیشیچه: «انیق ریجهم بار و ایشلریمنی ترتیبلی بجرهمن. اویده فرزندلریم بیلن همکارلیکده ایشلرنی اوز وقتیده بجرهمن و مکتب ایشلرینی هم مکتبده آلیب بارهمن.»
شو بیلن بیرگه، ایریم عیال اوقیتووچیلرنینگ تجربهسی شونی کورستهدی کی، آنهلیک اولرنینگ صبر، چیدهملیک و مهربانلیگینی درس بیریش جریانیده آشیرگن؛ بو ایسه تعلیم صفتینی یخشیلشگه آلیب کیلگن.
اوشبو آلتی اوقیتووچینینگ ایتیشلریچه، آنهلیک اولر گه اوقووچیلری بیلن مناسبتده مهربانراق و احتیاطکارراق بولیشگه یاردم بیرگن.
۱۰ ییلدن بیری بغلان مرکزی پلخمری شهریده اوقیتووچی صفتیده فعالیت یوریتیب کیلهیاتگن کامله امیری، ایش باسیمی و عایلهوی مسئولیتلر گه قرهمی، آنهلیک اونگه اوقووچیلری بیلن یخشیراق و مهربانراق مناسبتده بولیشگه یاردم بیرگنینی بیلدیرهدی. او شوندهی دییدی: «چرچگنیمده بیرآز دم آلهمن و عایله بیلن صحبتلشهمن، شونده تینچلیگیمنی سقلهی آلهمن. آنهلیک مینگه اوقووچیلریمگه مهربانراق و صبرلیراق بولیشگه یاردم بیرهدی، چونکی اولرنی اوز فرزندلریمدیک کورهمن.»
شو بیلن بیرگه، ایریم عیال اوقیتووچیلر ایکی مسئولیتنی بیر وقتنینگ اوزیده بجریش بوییچه باشقچه تجربه گه ایگه. مالیهوی قیینچیلیکلر، وقتنی بجریشدهگی ضعیفلیک، عمومی و عایلهوی قوللب-قوتلنیش میکانیزملری یوقلیگی – اولرنینگ دوچ کیلهیاتگن اینگ مهم قیینچیلیکلردن دیر.
سرپللیک اوقیتووچی نجیلا محمدی، وقت ییتیشمسلیگی سببلی آنهلیک و اوقیتووچیلیک مسئولیتلرینی بیر وقتده باشقره آلمسلیگینی ایتهدی؛ بو حالت اونی باسیم آستیده قالدیرگن. اونگه کوره: «اینگ کتته قیینچیلیک شونده کی، بیر وقتده نهفقط اوقووچیلریمگه بلکی فرزندلریمگه هم اعتبار قرهتیشیم کیرهک. مکتبده بولگنیمده کوپ فکریم اویده بولهدی و تولیق دقتیمنی جمعلهی آلمهی من، اویده بولگنیمده ایسه مکتب ایشلرینی یخشی بجره آلمهی من.»
سرپل ولایتیدن اوقیتووچیلردن باشقه بیری راضیه، وقت ییتیشمسلیگی، عایله تامانیدن قوللب-قوتلنمسلیگی، جمعیتده یاردمچی آست قوریلمهلرنینگ یوقلیگی و پست معاشنی جدی قیینچیلیکلردن بیلهدی؛ بو معمالر اونینگ آنهلیک و اوقیتووچیلیک مسئولیتلرینی ایدهآل طرزده بجریشیگه توسقینلیک قیلگن. او شوندهی دییدی: «بیزنینگ اینگ کتته قیینچیلیگیمیز آنهلیک و اوقیتووچیلیک مسئولیتلرینی بیر وقتده بجریشده وقت ییتیشمسلیگی، امکانیتلرنینگ یوقلیگی و مالیهوی قیینچیلیکلر دیر. فرزندیمیز اویده بولگنده، برچه دقتیمیز اولر گه قرهتیلهدی.»
شو بیلن بیرگه، ایریم عیال اوقیتووچیلر مکتب حدودیده باغچه کبی امکانیتلر ایجاد ایتیلیشی، اولرنینگ درس بیریش پیتیدهگی دقتینی آشیریب، تعلیم صفتینی یخشیلشی ممکن دیب بیلهدیلر.
بغلانلیک اوقیتووچی شکیلا نظری، فرزندلر اوچون باغچه تشکیل ایتیش اوقیتووچیلرنینگ درس بیریش پیتیدهگی دقتینی آشیریشی ممکنلیگینی ایتهدی. اونگه کوره: «اگر باغچه بولسه و فرزندلریمیز او ییرده بولسه، اولرنی تینچلیک بیلن تاپشیریشیمیز ممکن و بیز خاطر جمع و تولیق دقت بیلن درس بیریشگه ایریشهمیز. شونینگدیک، بو امکانیت عایلهمیز گه غمخورلیکنی یخشیراق بجریشیمیز گه یاردم بیرهدی، چونکی جسمانی و روحی تینچلیککه ایگه بولهمیز.»
دایکندیلیک ۳۴ یاشلی اوقیتووچی حافیظه احمدی، عیال اوقیتووچیلر اوچون کوپراق امکانیتلر یرهتیلیشینی تأکیدلهیدی، شونده اولر مسئولیتلرینی تشویشسیز یخشیراق بجریشلری ممکن بولهدی. او شوندهی دییدی: «اگر بوندهی امکانیتلر ایتیلسه، بو حقیقتن جوده یخشی بولهدی و حیاتیمیز گه ایجابی تأثیر کورستهدی. بو امکانیتلر بیزنی تشویشلردن خلاص قیلهدی و وظیفهلریمیزنی اینگ یخشی طرزده بجریشگه امکان بیرهدی. بو اصول نهفقط بالهلرنی تربیهلشگه تأثیر قیلهدی، بلکی ایشیمیزگه کوپراق دقت قرهتیشیمیزگه یاردم بیرهدی.»
عیال حقوقی فعالی تهمینه منگل، عیال اوقیتووچیلر انیق ریجهلشتیریش و استوارلیکنی بیلگیلش آرقهلی مسئولیتلری اورتهسیده موازنت یرهتیشلری ممکنلیگینی ایتهدی. اونینگ ایتیشیچه: «عیال اوقیتووچیلر توغری ریجهلشتیریش استوارلیکلرنی بیلگیلش و اویده مسئولیتنی تقسیملش آرقهلی اوقیتووچیلیک و آنهلیک اورتهسیده موازنتنی سقلشلری ممکن. عایله و جمعیت هم عملی یاردم، مثلاً اوی ایشلریگه یاردم بیریش و بالهلر گه غمخورلیک قیلیش آرقهلی اولرنینگ موفقیتیگه زمین یرهتیشی کیرهک.»
تعلیم بوییچه متخصص جمالالدین سلیمانی، آنه بولگن اوقیتووچیلر باشلنغیچ صنفلرده یخشیراق نتیجه کورسهتیشی ممکن دیب حسابلهیدی. اونگه کوره: «بیر اوقیتووچی یخشی اوقووچیلرنی تربیه لهیدی، او اوزی هم آنه بولسه. شو سببلی عادتده بیرینچی، ایکینچی و اوچینچی صنفلرنی تجربهلی اوقیتووچیلر گه تاپشیریشهدی؛ آنه بولگن عیاللر اوقووچیلرنی یخشیراق توشونیشلری، اولرنینگ روحی حالتینی اورگهنیشلری و صفتلی تعلیم بیریشلری ممکن.»
روانشناس محمدبلوچ، عیاللر اوقیتووچیلیک و آنهلیک اورتهسیده موازنت یرهتیش اوچون قوللب-قوتلشگه محتاج، شونده اولر خاطر جمع حالده ایشلرینی دوام ایتتیره آلیشهدی، دییدی. اونینگ ایتیشیچه: «اوقیتووچیلیک و آنهلیک اورتهسیده موازنت یرهتیش اوچون بیرار قوللب-قوتلاوچی شخصنینگ موجودلیگی ضرور. آنه فرزندینینگ حالتیدن خبردار بولسه، او درس بیریشگه کوپراق اعتبار قرهتیشی ممکن.»
اقتصاد شناس شاکر یعقوبی، عیال اوقیتووچیلرنینگ ایش ثمرهدارلیگینی آشیریش اوچون مالیهوی قوللب-قوتلش و ایش جایلریده امکانیتلر یرهتیش ضرور، دیب توشونهدی. او شوندهی دییدی: «باغچهلر بار بولیشی کیرهک، شونده اوقیتووچی فرزندینی پرورش قیلیشدن خاطر جمع بولیشی ممکن. شونینگدیک، عیال اوقیتووچی مکتبده یا کی ایش جاییده مناسب و ییترلی معاش آلیشی کیرهک، شونده او اقتصادی احتیاجلرینی قاندیره آلهدی. بونده نهفقط اقتصادی تأمینات بلکی روحی تینچلیک بیلن هم اوز وظیفهلرینی بجریشی ممکن.»
بیرلشگن ملتلر تشکیلاتینینگ بالهلرنی قولب-قوتلاوچی صندیغی (یونیسف) معلوماتیگه کوره، صنفلرده عیال اوقیتووچیلرنینگ بارلیگی قیزلرنینگ مکتب گه قتنهشیشی و دوامیلیگینی آشیریشده مهم رول اوینهیدی؛ چونکی کوپلب عایلهلر قیزلرینی عیاللر تامانیدن اوقیتیلیشینی افضل کوریشهدی.
