قربان هییت بیرمی ییتیب کیلیشی، هوا ایسیق بولیشی و کانگو کسللیگی توغریسیده آگاهیلیک کملیگی بیرحالده، یشاوچیلر آرهسیده بو کسللیککه چلینیش توغریسیده خواطرلر کوپهیگن.
اوزلری یا-ده یقینلریدن بیری اوشبو کسللیککه چلینگن بیر قطار عایلهلرنینگ ایتیشلریچه، ییترلیچه آگاهیلیک یوقلیگی، چاروهلرگه یقینلشماق، حیوانلرنینگ قربانلیک بولیشی پیتیده احتیاطسیزلیک، بو کسللیک یوقیشی اصلی عامللریدن بولگن.
۳۵ یاشر ایناغهسی کانگو کسللیگیگه چلینگن هرات ولایتی انجیل تومنی یشاوچیسی حبیباللهنینگ ایتیشیچه: «ایناغهم چاروهچی دیر و بیر قطار سیگیر و قوینی سقلهیدی. اوییده سیگیر و قویی بار ایدی. اونینگ آغیز و بورنیدن قان کیلهردی. کسلخانه گه آلیب بارگنیمیزده کانگو کسللیگیگه چلینگن دیدیلر و ساغهیشی اوچ یریم آی زمان آلدی.»
تورموش اورتاغی بیلن کانگو ایستمهسیگه چلینگن کاپیسا ولایتی آلهسای تومنی یشاوچیلریدن جنتگلنینگ ایتیشیچه: «کسل بولدم و تنهمده جودهیم یامان شکلده آغیریقنی حس قیلهردیم. کوزلریم و قارنیم آغیریدی و یورهگیم بوزیلیدی. بو کسللیککه چلینگنیمدن بیر هفته بولگنیده تورموش اورتاغیم هم چلیندی. جوده یامان بیر کسللیک دیر و شفاکار که بارمهگنیم صورتده، جانمنی قولدن بیرهردیم.»
کابل شهری ۱۵-ناحیه یشاوچیسی بولمیش حلیمهنینگ ایتیشیچه، خالهسی کانگو ایسیتمهسیگه چلینگنیدن کیین وفات قیلگن. «خالهم ولایتگه کیتگن ایدی و او ییرده چاروهلر کوپ دیر. قولیدن کنه چاققن و ایکی کوندن کیین اوشه قسمت کوکهرگن و آغیریگن. قان کیتیشی کوپ ایدی، کابلگچه ییتیشه آلدی و کیین جان بیردی.»
شوندهی بیرحالده، شفاکارلرنینگ آگاهلنتیریشیچه، کانگو ایسیتمهسی یوقمه بیر کسللیک بولیب، چلینگنلردن ۱۰ دن ۴۰ فایزینینگ اولیمی ممکن.
کابل انتانی کسلخانهسیدهگی شفاکارلردن فریدالله عمری، اوشبو کسللیککه چلینیشنینگ آلدی آلینیشی توغریسیده ایتیشیچه: «مذکور کسللیک جدی و یوقمه بیر کسللیک بولیب، کنه آرقهلی انتقال تاپهدی. آلدی آلینیشی اوچون هییت کونلریده قوللرینگیز یرهلنگنی صورتده، قربانلیککه قول اورمنگ. قربانلیک قیلهدیگن کیشی دستکش، پیشبند، عینک و ماسکدن فایدهلنسین و قربانلیکدن کیین چاروه قانی و قربانلیک بولگن جای سوو و صابون بیلن یوویلسین.»
اسلام امیرلیگی ساغلیقنی سقلش وزیرلیگی سوزلاوچیسی شرافتزمان امرخیلنینگ ایتیشیچه، اوشبو وزیرلیک کانگو ایسیتمهسی ترقهلیشی آلدی آلینیشی اوچون ولایتلردن قطاریده دارو سیپیلیش کمپاینلرینی یولگه قویگن. «ساغلیقنی سقلش وزیرلیگی اهالی گه آگاهیلیک بیریش بیلن کانگو کسللیگیگه چلینیش آلدی آلینیشی اوچون سعیوحرکت قیلماقده. حاضر تورلی ولایتلرده آگاهیلیک بیریش کمپاینلری دوام قیلماقده و یشاوچیلردن قربانلیک قیلگنلریده کانگو آلدی آلینیشی اوچون کیرهکلی احتیاطنینگ رعایت بولیشینی سورهیمیز. شونینگدیک چاروه ساتیلهدیگن جایلرگه دارو سیپهمیز که کنهلر اورتهدن کیتسین و کانگو کسللیگی یوقمهسین.»
شونینگدیک خلقارا ساغلیقنی سقلش تشکیلاتینینگ گزارش بیریشیچه، اپریل آییده کانگو ایستمهسینینگ ۱۵۲ شبهلی و بو کسللیککه تیگیشلی آلتی حالتی ثبت بولگن که بو رقم، اوتگن آیگه نسبت ۱۴۱.۳ فایز آشگن.
کانگو ایسیتمهسی، جدی و اولدیرهدیگن یوقمه بیر کسللیک بولیب، کوپراق کنهنینگ چاقیشی یا-ده قان و افلاسلنگن چاروهلرگه یقینلشماقده بیلن انسان گه یوقهدی.
