مین ساویز ابرار من، ژورنالیزم یونهلیشینی تماملهگن و حاضرده خصوصی ایشخانهلردن بیریده دیزاینر صفتیده ایشلهی من. فعالیتیم اساساً دیزاین یونهلیشلریگه قرهتیلگن، گرافیک غایهلردن تارتیب محتوا ایشلب چیقریشگچه بولگن ایشلر فعالیتیمنینگ قسمینی تشکیل ایتهدی و ترقهتیش اوچون تیارلنهدی. بو کسب گه بولگن قرهشیم فقط درآمد تاپیش ایمس؛ مین اوشبو ساحه گه ییللر اول قیزیقردیم. بو ساحه همه نرسهدن کوره کوپراق ایجادکارلیکنی طلب قیلهدی و بو جریانگه یاردم بیره آلهدیگن هر قندهی واسطه مین اوچون قدرلی. صنعی هوش بیلن تنیشوویم و اونگه یوزلنیشیم، دستلبکی سلبی قرهشلرگه قرهمی، عینن منه شو ایجادکارلیک ایستهگیدن کیلیب چیققن.
صنعی هوش تکنالوژی دنیاسیده ینگی حادثه صفتیده تاپیلگن ایلک کونلرده مین اونی ایریشیب بولمهیدیگن و بعضاً فایدهلنیش قیین بولگن واسطه دیب بیلردیم. بوندهی قرهشیمنینگ سببی، بو تکنالوژی و اونگه عاید پلتفرمهلر حقیده ییترلی بیلیمگه ایگه ایمسلیگیم ایدی. مین صنعی هوش اساساً عمومی مقصدلرده قوللنیلهدی، اوندن مسلکی فایدهلنیش ایسه مرکب و قیین دیب اویلردیم. بیراق وقت اوتیشی و تکنالوژینینگ جمعیتده تاباره کینگهیب باریشی بیلن اونگه بولگن قیزیقیشیم آرتدی. عینن شو قیزیقیش مینی صنعی هوش عالمیگه کیریشگه و او بیلن ایشلشنی باشلشگه اوندهدی.
صنعی هوش بیلن تنیشیش و اونگه سواللر بیریش ایلک تجربهم چتجیپیتی آرقهلی باشلندی. عینن شو سواللر بو واسطه بیلن ینهده کوپراق تنیشیشیم و اوندن منتظم فایدهلنیشیمگه زمینه یرهتدی. مین تورلی خیل سواللر بیرردیم و انیق، توشونرلی همده تیزکار جوابلر آلردیم. بو تجربه مینینگ صنعی هوش گه بولگن قرهشیمنی نهفقط اوزگرتیردی، بلکی مینی دایمی فایدهلنووچیلریدن بیریگه ایلنتیردی.
دستلب، مین کوپراق عادی و معلومات گه عاید سواللر بیرردیم. بیراق بو تکنالوژینینگ انیقلیگی، تیزلیگی و امکانیتلرنی انگلهگنیمدن سونگ، اونی ایش، تعلیم و غایه یرهتیش ساحهلریده جوده فایدهلی دیب بیلدیم. بو تنیشوو و اوندن منتظم فایدهلنیشیم صنعی هوشنی تورلی یونهلیشلرده یاردمچی واسطه صفتیده تنلهشیمگه سبب بولدی. حاضرده بو تکنالوژی مینینگ ایش و شخصی حیاتیمنینگ اجرهلمس قسمیگه ایلنگن. توشونچهلرنی سادهلشتیریش، معلوماتلرنی ترتیبلش و محتوانی ترتیب گه سالیش گه یاردمی مین اوچون مثلسیز بولدی.
حاضرده صنعی هوشنینگ منتظم فایدهلنووچیسی صفتیده اوندن اساساً اوچ یونهلیشده فایدهلنهمن. بیرینچی یونهلیش – متنلرنینگ توزیلمهسینی ترتیبلش بولیب بو بارهده او مینگه کتته یاردم بیرهدی؛ او نهفقط متننی چیرایلیراق قیلیش، بلکی توشونچهلرنی قیته افادهلشده هم قوللب-قوتلهیدی. ایکینچی یونهلیش – غایه یرهتیش ساحهسی. بو ییرده صنعی هوش دیزایندهگی ایجادکارلیکنی رواجلنتیریش اوچون کتته امکانیتلر یرهتهدی. اوچینچی یونهلیش ایسه وقتیم کم بولگن ایش و لایحهلرنی تیزلشتیریش بیلن باغلیق. صنعی هوش ریجهلر و ایشلرنی ینهده تیز و انیقراق یکونلشیمگه یاردم بیرهدی.
البته، صنعی هوش فایدهلنووچیلر اوچون یرهتگن قولیلیکلر و افضللیکلر بیلن بیر قطارده، اونینگ چقیریقلری و تهدیدلریگه هم اعتبار قرهتیش ضرور. اینگ کتته خواطرلردن بیری فایدهلنووچیلرنینگ اوشبو واسطه گه حددن تشقری باغلنیب قالیشی دیر. اوندن معیاریدن آرتیق تنقیدی یاندهشووسیز فایدهلنیش نتیجهسیده انسانلرنینگ شخصی و کسبی حیاتی صنعی هوش گه آرتیقچه درجهده تیهنیب قالیشی ممکن. بو ایسه اوز نوبتیده اولرنینگ فکرلش قابلیتی و ایجادکارلیک صلاحیتینینگ پسهیشیگه آلیب کیلیشی احتمالدن خالی ایمس.
صنعی هوش بیلن باغلیق تکنالوژیلر، یرهتگن امکانیت و افضللیکلری بیلن بیرقطارده، ایریم معمالر و چقیریقلرنی هم اوز ایچیگه آلهدی. ایریم کسبلر اونینگ تأثیریگه توشیشی ممکن و فایدهلنووچیلر اوچون باشقه خواطرلر هم یوزه گه کیلیشی احتمالدن خالی ایمس. شونگه قرهمی، مینینگ برچه فایدهلنوچیلر گه اینیقسه یاشلر گه مراجعتیم شو کی، صنعی هوشدن ایجادی و عملی یاندهشو بیلن فایدهلنیش لازم، بیراق اونگه هیچ قچان تولیق باغلنیب قالمسلیک کیرهک.
