قربان هییت بیرمی ییتیب کیلیشی بیلن، افغانستان ده عیاللردن قطاری اوی چیقریش و اوینی تازهلش ایشلری بیلن شغللنهدیلر؛ بیراق شفاکارلرنینگ آگاهلنتیریشیچه، اینیقسه حاملهدارلیک دورهسیده عیاللرنینگ کیتمه-کیت ایشلش و آغیر ایشلرنی قیلیشی، آنه و جنین ساغلیگی اوچون جدی و خوفلی عاقبتلرگه سبب بولیشی ممکن.
شفاکارلرنینگ ایتیشلریچه، بو وضعیت بیر قطار قیینچیلیکلر جملهدن جنین رشدی کیچیکتیریلیشی، جنین توشیشی، فشار پس توشیشی، بیل آغیریق و حتا چقهلاقنینگ وقتدن آلدین دنیا گه کیلیشیگه سبب بوله آلهدی.
بو توغریده نسایی-ولادی شفاکارلریدن زرغونه محبتنینگ اورغولشیچه، عیاللر حاملهدارلیگی بیللی بولگنیدن توغیش پیتیگه قدر آغیر ایشلر و اوی چیقریش ایشلرینی عملگه آشیریشده احتیاط قیلیشلری کیرهک. اونینگ کوپهیتیریشیچه، حاملهدارلیک پیتیده آغیر نرسهلرنی کوتریش، جنین توشیشیگه سبب بولهدی. «حاملهدارلیکلریدن ایکی یا-ده اوچ هفته اوتگنیده حتا آغیر نرسهلرنی کوترمسلیکلری کیرهک. اوزلری و قارینلریدهگی جنینگه توجه قیلیشلری کیرهک. حاملهدار عیاللرده اورته گه کیلهدیگن قیینچیلیکلرنینگ آلدینی آلیش ممکن ایمس و حتا بچهدان ایچیده جنیننینگ اولیمیگه سبب بوله آلهدی. انه شوو سبب توصیه بولهدی که اوینی تازهلشده کوپ احتیاط قیلیشلری کیرهک.»
شونینگدیک نسایی-ولادی شفاکارلریدن باشقه بیری عابده رها، حاملهدارلیک پیتیده آغیر ایشلر قیلینیشینینگ جنین توشیشی عامللریدن عنوان قیلیب و ایتیشیچه، بو ایشلر عملگه آشیریلیشی جنین رشدی توختهشی و حتا چقهلاقنینگ اولگن شکلده دنیا گه کیلیشیگه سبب بوله آلهدی. «باش اوچ آی کوپ خوفلی دیر و تدقیقاتلرگه کوره، جنیننینگ اولیمی سببلریدن بیری آغیر ایشلرنی عملگه آشیریش دیر که حاملهدار عیال حاملهدارلیک دورهسیده کوپ آغیر ایشلرنی قیلگن و جنین درست رشد قیلمهی و اولگن.»
شونینگدیک ارتوپیدی شفاکارلری، حاملهدار عیاللر اوچون آغیر ایشلر سلبی عاقبتلریدن آگاهلنتیریب و ایتیشلریچه، بو ایشلرنی قیلیش عضلهلر، بیل آغیریق، سویک بندلری آغیریشی و تیزهلرگه فشار کیلیشیگه سبب بولیشی ممکن.
ارتوپیدی شفاکارلریدن فواد عمرنینگ ایتیشیچه: «حاملهدارلیک پیتیده آغیر نرسهلرنی کوتریش آنه و جنین اوچون خوفلی بوله آلهدی. خم و راست بولیشی یا-ده آغیر نرسهلرنی کوتریش بیل آغریق و سویک بندلری آغیریشینی اورته گه کیلتیره آلهدی. آغریق تاپیلگنیده ۵۰ فایز دیسک کمر گه سبب بولگن و ایکینچیده بچهدان گه فشار کیلهدی که بچهدان و قارینگه فشار کیلگنیده، بیرینچیده جنین توشیشی و ایکینچیده ایسه جنیننینگ وقتدن آلدین دنیا گه کیلیشی ممکن.»
شوندهی بیرحالده، تازهلش ایشلری و اوی چیقریش هییت بیرمی تیارگرلیگی اوچون مملکتدهگی فرهنگلردن بیری دیر. هییت بیریمی ییتیب کیلیشی بیلن عیاللر کیتمه-کیت ایشلش و آغیر نرسهلرنی کوتریش بیلن بو فرهنگنینگ عملگه آشیریشگه سعیوحرکت قیلهدیلر که بو موضوع، عیاللر اینیقسه حاملهدار عیاللر اوچون جدی قیینچیلیکنینگ یرهتیشی ممکن.
قندوز یشاوچیسی بولمیش ۳۳ یاشر زرینهنینگ ایتیشیچه، ییتی آیلیک حاملهدار بولگنی بیلن، بیراق تازهلش و کیتمه-کیت ایشلش سبب، اوزینی ینهده حالسیز و چرچهگن حس قیلهدی. «اوی ایشلریده وقفه آلمهیمن. وقفه آلگنیمده بیر-ایکی ساعتدن کوپراق وقفه آلمهیمن. کیتمه-کیت ایشلهیمن. ایشلش ایاغ آغریق، بیل آغریق، قول آغریق و حتا فشار پس توشیشیگه سبب بولهدی. چقهلاغیم حرکتی بعضا کوپ ایشلهگنیمده بیحد کوپهیهدی.»
بیش آیلیک حاملهدار بولگن کابل یشاوچیسی ۳۴ یاشر شبنم رحمتینینگ ایتیشیچه، هییتدن آلدین اوی چیقریشنینگ باسیمی بیل آغریق، جسمی قیینچیلیک و اویقوسی بوزیلیشیگه سبب بولگن. «اوی چیقریش، قالین یوویش و باشقه آغیر ایشلرنی قیلیش بیل آغریق و ایاغ آغیرققه سبب بولدی. بوندن آلدین هم جوده ضعیف ایدیم. کون بویی ایشلشیم سبب کیچه هیچ اوخله آلمهیمن. اوزیم بیلهمن که چقهلاغیم حرکتی اونچه ایمس.»
شونینگدیک پروان یشاوچیسی بولمیش ۴۰ یاشر خدیجهنینگ ایتیشیچه، هییت بیرمی ییتیب کیلیشی بیلن اوی ایشلری کوپهیب، حاملهدارلیک و چرچهش بیلن ینه هم کیتمه-کیت اوی ایشلریگه دوام بیریشگه مجبور دیر. اونینگ کوپهیتیریشیچه، ایرککلر تشقری ایشلری مقصد اوی ایشلریگه حصه قوشمهیدیلری و اویدهگی آغیر مسئولیتلر ایسه عیاللر و قیزلر زمهسیگه دیر. «تورت آیلیک حاملهدارمین. اوی ایشلرینی باشلهدیم و تیز بیتسین دیب کیتمه-کیت ایشلهپمن. کییملرنی هم یودیم و جودهیم چرچهدیم. ایرککلر تشقری ایشلری بیلن مصروفلر و اویده ایشلریگه یاردم بیریشگه وقتلری یوق.»
متخصص شفاکارلر عیاللر اینیقسه حاملهدار عیاللر آرهسیده بیل آغریق و آغیر ایشلر قیینچیلیکلری آلدی آلینیشی اوچون، ۱۰ کیلوگرامدن کوپراق وزن، ۳۰-۴۰ دقیقهلیک استراحت قیلیش، ایش جریانیده کمربنددن فایدهلنیش و ساغلام آوقتلنیش کبی یوللرنی توصیه قیلهدیلر.
