سلاموطندار بیلن صحبت قیلگن ایریم عیاللر، اویده و طبیات مرکزلریده توغروق پیتیده دوچ کیلگن قیینچلیکلریدن شکایت قیلیشگن. اوشبو گزارشده سونگی بیر ییل ایچیده اویده یا کی شفاخانهده توغروق تجربهسینی باشدن کیچیرگن ۲۰ یاشدن ۴۸ یاشگچه بولگن سکیز ولایتدن ۱۰ نفر عیال بیلن صحبت قیلینگن.
نتیجهلر شونی کورستهدی کی، بو عیاللر توغروق جریانیده توغروق و دارو-درمانلر اوچون کتته خرهجتلر، اوزاق مصافه و ترانسپورت واسطهلرینینگ یوقلیگی، طبیات خادملری و ضرور امکانیتلرنینگ آزلیگی، اوی شرایطیدهگی توغروقده قان کیتیشی و کوچلی آغریقلر، شونینگدیک، شفاخانهلرده خادملرنینگ ناتوغری معاملهسی و امکانیتلرنینگ ییترلی ایمسلیگی کبی معمالر گه دوچ کیلگن.
توغروق خرهجتلری؛ عایلهلر گه قوشیمچه باسیم
بدخشان ولایتیدن بولگن شرعیات فاکولتهسینی لیسانس درجهده بیتیرگن و ایکی فرزندنینگ آنهسی ۲۹ یاشلی بیبی نسیمه رحمانی، ایکی فرزندینی هم شفاخانهده دنیا گه کیلتیرگنینی ایتهدی. اونگه کوره، دولت شفاخانهسیگه مراجعت قیلگن بولسه-ده، توغروق خرهجتلری و دارو-درمان ساتیب آلیش عایلهلر گه کتته اقتصادی باسیم کیلتیرهدی. او شوندهی دییدی: «توغروق جریانیده معمالر کوپ. اقتصادی معما هم بار، چونکی اوزینگیز بیلهسیز، توغروق جریانیده مصرف کوپیهدی. پساندازینگیز بولسه یخشی اما اگر بولمسه، قرض گه باتیب جوده کوپ قیینچیلیکلر گه دوچ کیلهسیز.»
جوزجان ولایتی آقچه تومنیدن بولگن ۲۱ یاشلی تمنا، اوچ فرزندنینگ آنهسی بولیب، برچه توغروقلری کلینیکده عملگه آشیریلگنینی بیلدیرهدی. اونینگ سوزلریگه کوره، طبیات مرکزنینگ اوزاقلیگی سببلی فرزندینی یوقاتیش خوفی گه دوچ کیلگن. او بوتوغریدهگی فکرینی شوندهی بیلدیرهدی: «ایکی قیزیم و بیر اوغلیم بار. اوچ مرته توغروق قیلگن من و هر مرته هم کلینیکه مراجعت قیلگن من. بیز چیککه تومنلردن بیریده یشهیمیز، یول جوده اوزاق. کلینیکه ییتیب بارگنیمیزچه جوده قینلدیم، حتا اوزیم و فرزندیم هلاک بولیشیگه آز قالگن.»
دایکندی یشاوچیسی بولگن ۳۵ یاشلی زهرا احسانی، تورت قیزی بارلیگینی، اولردن ایکی نفری اویده، ینه ایکی نفری ایسه طبیات مرکزیده توغیلگنینی ایتهدی. او اوی شرایطیده توغروق قیلگنیدن یخشی خاطرهلری یوقلیگینی، چونکی توغروقلری اوزاق دوام ایتگن آغریق و کوچلی قان کیتیشی بیلن کیچگنینی معلوم قیلهدی. او شوندهی دییدی: «ایکی قیزیمگه قابله بولمهگنی سببلی اویده توغیشگه مجبور بولگن من. کتته ایکی قیزیم ایسه شفاخانهده توغیلگنیده، اوی قابلهلر هم یانیمده بولگن. آغریقلریم جوده کوچلی و اوزاق دوام ایتدی. توغروقدن کیین کوپ قان کیتدی و شوندن سونگ روحی حالتیم و عصبلریم جدی قیینچیلیک تاپگن.»
شفاخانهلر؛ امکانیتلرنینگ آزلیگی و باشقه معمالر
عیاللرنینگ معمالری فقط اوی شرایطیدهگی توغروق بیلن چیکلنمهیدی. ایریم عیاللرنینگ ایتیشیچه، اولر طبیات مرکزلریده توغروق وقتیده هم تورلی معمالر گه دوچ کیلگن.
کاپیسا ولایتی نجراب تومنیدن بولگن ۲۷ یاشلی سحر احمدی، اوشبو ولایتدهگی مکتبلردن بیریده اوقیتووچی بولیب ایشلهیدی و بیر فرزندی بار. او طبیات مرکزیده توغروق پیتیده دوچ کیلگن معمالری حقیده شوندهی دییدی: «بیر مرته توغروق قیلگن من و او شفاخانهده عملگه آشیریلگن. توغروق جریانیده جوده کوپ معمالر گه دوچ کیلدیم. پنچشیر گه بارگن ایدیم، او ییرده امکانیتلر ییترلی درجهده یخشی ایمس ایدی، یخشی آوقت هم یوق ایدی. بو معمالر توغروق جریانیمگه سلبی تأثیر کورستدی.»
شفاکارلر: امکانیتلرنینگ آزلیگی و ایش باسیمی، توغروق اساسی معمالری دیر
شو بیلن بیرگه، نساییولادی متخصصلری توغروق و آنهلر گه طبی یاردم کورسهتیش بارهسیده تجربهلریگه تیهنیب، قان کیتیش، کمقانلیک، قان باسیمی، کیتمه-کیت توغروقلر، متخصصلر آزلیگی همده نساییولادی بولیمی شفاکارلرینینگ یوقاری ایش باسیمینی توغروق جریانی و طبی خذمت کورسهتیشدهگی اساسی معمالر صفتیده عنوان قیلهدیلر.
نساییولادی شفاکاری رمان اباسیننینگ ایتیشیچه، میلادی ۲۰۲۵ و ۲۰۲۶-ییللرده حاملهدار عیاللر آرهسیده یوقاری قان باسیمی بیلن باغلیق کوپلب حالتلر گه دوچ کیلیشگن. اونینگ سوزلریگه کوره، بوندهی حالت آنهلرنی اولیم خوفی بیلن یوزمه-یوز قالدیرهدی. اونگه کوره، آنهلرنینگ یاشلیگی اوشبو معمالردن بیرینینگ اساسی سببلریدن بیری دیر. او شوندهی دییدی: «میلادی ۲۰۲۵ و ۲۰۲۶ ییللرده بیز کوپینچه اکلمسیا و پریکلمسیا حالتلریگه، یعنی بیمارنینگ قان باسیمینینگ کوتریلیشی و پسهیشیگه دوچ کیلدیک. بیمارنینگ قان باسیمی کوتریلگنده، اونینگ ارگانیزمیده اوزگریشلر یوز بیرهدی و کسل کوما گه توشهدی. کوما گه توشگن کسللرنینگ کوپچیلیگیده میه گه قان ییتیب بارمهیدی، بو ایسه آنهلر اولیمینینگ کوپهیشیگه آلیب کیلهدی. بونینگ سببلریدن بیری آنهلرنینگ ۲۰ یاشدن کیچیک بولیشی دیر.»
ینه بیر نساییولادی شفاکاری سونیتا بهرامنینگ ایتیشیچه، توغروقدهگی معمالرنینگ آلدینی آلیش اوچون عیاللر حاملهدارلیک اوچون ماس یاشده، یعنی ۱۸ یاشدن ۲۹ یاشگچه بولیشی کیرهک. اونینگ سوزلریگه کوره، بو یاشده عیاللر ارگانیزمی ییترلی مقدارده ویتامین و منراللر گه ایگه بولهدی و طبیعی توغروق احتمالی یوقاری بولهدی. او شوندهی دییدی: «اینگ یخشی یاش ۱۸ یاشدن ۲۹ یاشگچه بولگن دور دیر. بو یاشده حاملهدار بولگن هر بیر عیالده آغیر حالتلر، پاتولوژیک حالتلر، کسللیکلر یا کی حاملهدارلیک و توغروق دوریدهگی اسارتلر کمراق اوچرهشی ممکن. چونکی بو یاشده عیال یا کی آنهنینگ ارگانیزمیده ویتامینلر و منراللر ییترلی مقدار ده بولهدی. او باقوت بولیشی و توغری آوقتلنیشدن یخشیراق فایدهلنیشی ممکن.»
توغیلیشلر ثبتی کوپهیشی؛ طبی خذمتلردن فایدهلنیش امکانیتینینگ آشیش نتیجهسی
برچهسی بیلن، ساغلیقنی سقلش وزیرلیگی تامانیدن تقدیم ایتیلگن رسمی رقملر، میلادی ۲۰۲۵-ییلده توغیلیشلر قیدی کوپهیگنینی کورستهدی. وزیرلیک مسئوللرینینگ ایتیشیچه، میلادی ۲۰۲۵-ییلده مملکت بوییچه ۱.۳ میلیون ته توغیلیش قید ایتیلگن. حال بوکی، میلادی ۲۰۲۴-ییلده بو کورستکیچ ۱.۱ میلیون ته بولگن. بو حالت برچه معمالر گه قرهمی، طبی خذمتلر گه مراجعت قیلیش و توغیلیشلر سانی آشگنینی کورستهدی.
نساییولادی شفاکارلرینینگ فکریچه، توغروق پیتیده معمالرنینگ اساسی سببلری حاملهدارلیک یاشینینگ پستلیگی بیلن بیرقطارده، طبی امکانیتلر و ضرور جهازلرنینگ ییترلی ایمسلیگی همده اوشبو مرکزلرده طبیات خادملرینینگ آزلیگی دیر. شو بیلن بیرگه، ساغلیقنی سقلش وزیرلیگی مسئوللری، میلادی ۲۰۲۵-ییلده توغیلیشلر قیدینینگ کوپهیشیگه سبب طبی خذمتلردن فایدهلنیش امکانیتینینگ آشگنینی تأکیدلماقده. چونکی ایلگری کوپلب توغروقلر اوی شرایطیده عملگه آشیریلگن و عادتده قید ایتیلمهگن.
