نورستان ولایتیدن دولتی بیر منبع نینگ کیملیگی سیرقالیشنی ایستهب سلاموطندارگه ایتیشیچه، امنیتی کوچلر اوشبو ولایت نینگ «دوآب» و «مندول» تومنلرینی ترک قیلگنلر و اوشبو ایکی تومن طالبان نظارتیگه اوتگن.
عینحالده، نورستان ولایتی کینگش باشلیغی سعدالله پایندهزوی نینگ سلاموطندارگه ایتیشیچه، اوشبو ولایت نینگ دوآب و مندول تومنلری اوتگن کیچه ساعت ۹:۳۰ ده طالبان قولیگه سقوط قیلگن و امنیتی کوچلر بو تومنلرنی ترک قیلیشگه مجبور بولگنلر.
نورستان ولایتی کینگش باشلیغیگه کوره، مذکور ایکی تومن ۲۰ کوندن بویان طالبان قمراویگه قرار تاپگن ایدی، بیراق کمکی کوچلر یوباریلمهگنی سبب، امنیتی کوچلردن بیرقطاری طالبان گروهیگه قوشیلیب و باشقه بیرقطاری ایسه مذکور تومنلرنی ترک قیلگنلر.
سعدالله پایندهزوی نینگ کوپهیتیریشیچه، نیچه مدتدن بویان دوآب و مندول تومنلری (دوآب) تومنیدن مدیریت ایتیلهریدی؛ لیکن اوتگن کیچه اوشبو تومنلر آتیشمه یوز بیرمسدن طالبان قولیگه سقوط قیلگن.
عینحالده، نورستان ولایتی نینگ نورگرام تومنی یشاوچیلریدن بیرقطاری و محلی خبرچی صاحبداد همدرد نینگ ایتیشیچه، دوآب و مندول تومنلری نینگ مسووللری ایکی هفته دن بویان مرکزی حکومتدن یاردم ایستهریدی، لیکن مرکزی حکومت دقت قیلمهگنی سبب، محلی مسووللر و امنیتی کوچلر اوشبو تومنلرنی ترک قیلیشگه مجبور بولگنلر.
اولرنینگ کوپهیتیریشیچه، وضعیت بوندهی دوام قیلگن صورتده، نورگرام تومنینی هم طالبان قولیگه سقوط قیلیشی ممکن.
نورستان محلی مسووللری دوآب و مندول تومنلری نینگ سقوط قیلگنی خصوصیده صحبت قیلمهگنلر.
عینحالده، طالبان گروهی نینگ بیر خبرنامه آرقهلی ادعا قیلیشیچه، دوآب و مندول تومنلری اوشبو گروه نظارتیگه اوتگن و امنیتی کوچلرگه تیگیشلی کوپ قطار حربی تجهیزات طالبان قولیگه توشگن.