۲۵ یاشر غلام‌سخی، مکتب اوقووچیلری، بیلیم یورت طلبه‌لری و باشقه ییگیت‌لر گه ایش زمینه‌سی نی فراهم قیلیش اوچون، ۸ ییل آلدین هرات مرکزی‌ده آز بیر هزینه بیلن دستکول تیکووچیلیک ایش‌خانه نی آچگن.
غلام‌سخی گه کوره، اوشبو ایشخانهده عیاللر و ایرککلر گه عاید تورلی خیل بیک و دستکول نی ایشلب چیقریب و قطار ولایت‌لر گه صادر ایته‌دی. مذکور هرات‌لیک یاش ییگیت اوشبو ایشخانهده ۵۰ کیشی گه ایش زمینه‌سی نی فراهم قیلگن.
بیزلرنینگ توییترده هم تعقیب قیلینگ!
غلام‌سخی نینگ کوپه‌یتیریشیچه: «بو ییرده کمیده ۵۰ کیشی ایشله‌یدی که اولردن ۱۰ ته‌سی نی عیاللر تشکیل بیره‌دی. بو ییرده ایشله‌یدیگنلردن بیر قطاری مکمل کون ایشله‌دیلر و بیر قطاری ایسه مکتب اوقووچیلری دیر و ییریم کون مکتب گه باریب و یریم کون ایسه بو ییرگه کیله‌دیلر. شونینگدیک اولر بو طریق مکتب خره‌جتی نی تامین قیله‌دیلر.»
باشقه بیر تامان‌دن، اوشبو ایشخانهده ایش گه مشغول بولگن اوقووچیلر و مهاجرت‌دن قیتیب کیلگن کیشی‌لردن قطاری نینگ ایتیش‌لریچه، انه‌شوو یول آرقه‌لی عایله و مکتب خره‌جتیدن بیر بولیمی نی تامین قیله‌دیلر.
مکتب اوقووچیلریدن مجتبی نینگ ایتیشیچه: «ایرتنگ چاغی مکتب گه باره‌من و اوندن کیین، ایش گه باریب ایش قیله‌من. ایشله‌گنیم پول نینگ یریمی نی اوی گه بیره‌من و باشقه‌سی نی مکتب خره‌جتی قیله‌من.»
شونینگدیک مهاجرت‌دن قیتگن مرتضی نینگ ایتیشیچه: «مملکت‌ده شو رقم ییگیت‌لر بولگنی و ایش موجود بولگنی بیر حالده، ییگیت‌لر تشقی گه کیتیب و درس و تعلیم‌دن قالیش گه مجبور بولمه‌یدیلر.»
افغانستان ده دستکول و بیک تیکیش صناعتی ینگی‌لیکده علاقه‌مندلری نی تاپگن، بیراق حاضرگچه بوتوغریده کوپ توجه بولمه‌گن.
بیزلرنینگ فیسبوک صحیفه‌میزگه باش اورینگ!
هرات بیلیم یورتی نینگ اقتصاد فاکولته رئیسی محمد‌ناصر معین، سرمایه یاتقیزووچیلردن غلام‌سخی کبی اقتصاد و ایچکی تولید‌لر نینگ رواج‌لنیشی خصوصیده سهم آلیشلری نی ایسته‌یدی.
شونده‌ی بیرحالده، هرات معلومات و مدنیت ریاست مسئوللری نینگ ایتیش‌لریچه، اوشبو ولایت نینگ محلی حکومتی صناعت‌چیلردن حمایت قیله‌دی.
غلام‌سخی آز بیر امکانیت و حمایت‌چی بیلن، تشقی توارلر قرشی‌سیدن رقابت قیله‌دی. او، بیر کون مملکت بویلب بوتون اهالی اوز مملکتیمیز نینگ ایشلب چیقه‌ره‌دیگن توارلریدن قوللنیشلری نی امید قیله‌دی.
