خوست کې د یوه ډله ځوانانو لهخوا «سهشنبه، وري ۱۴مه» زرګونه کسانو ته د دغه ولایت په «فوټبال لوبغالي» کې «ګډ روژه ماتی» برابر شوی و.
د ياد ګډ روژه ماتي یوه تنظیموونکي راشدالله همدرد سلاموطندار ته وويل چې په خوست کې د ځوانانو له لوري له تېرو اته کلونو راهیسې «ګډ روژه ماتی» جوړېږي چې موخه او هدف یې د خلکو ترمنځ يووالي دی.
د سلاموطندار پښتو فېسبوکپاڼه وڅارئ
د نوموړي په وینا، دې روژه ماتي ته یې د یاد ولایت زرګونه اوسېدونکي وربللي وو.
هغه وويل: «له تېرو اتو کلونو راهیسې خوست کې د يووالي په نوم روژه ماتی جوړيږي. دې روژه ماتي ته د ټولنې بېلابېل اقشار دعوتيږي، ځوانان، سپين ږيري، دولتي چارواکي، عام خلک دا ټول په ګډه دلته ګډون کوي. هدف مو ترې يووالي دی.»
د ياد روژه ماتي ځیني ګډونوال هم دا ډول پروګرامونه د ځوانانو د يووالي لپاره ګټور بولي او د زياتوالي غوښتنه يې کوي.
حکيمالله د روژه ماتي يو ګډونوال سلاموطندار ته وويل چې له دا ډول پروګرامونو څخه نورو خلکو ته هم د يووالي پيغام ورکول دي.
له تېرو اتو کلونو راهيسی خوست کې يوه ډله ځوانان هر کال یاد «ګډ روژه ماتی» جوړوي چې ټول لګښت یې له خلکو څخه د چندې په ډول راټولېږي.