طالبانو یو ځل بیا د کمال خان بند د ساتونکيو ټولي پر پوستو بریدونه کړي او د عامه ساتنې ۶ سرتېري یې وژلي دي.
د نیمروز ولایت یوه امنیتي سرچینه سلاموطندار ته وايي، دغه برید تېره شپه په فتحه کلا سیمه کې شوی چې په پایله کې یې د عامه ساتنې د دویم ټولي ۶ سرتېري وژل شوي او ۲ نور ټپيان شوي دي.
دغه برید په داسې حال کې ترسره کېږي چې طالبانو وړمه ورځ هم د دې ولایت په خاشرود ولسوالۍ کې ۲۳ افغان سرتېري ووژل او ۳ نور یې له ځانه سره ژوندي یوړل.
د کمال خان د کارونو له بشپړېدو سره په یوه وخت د دغه بند پر ساتونکيو بریدونه هم ډېر شوي دي.
له دې وړاندې ايراني چارواکيو ويلي وو چې حکومت يې ۸۵۰ ميليونه ډالره سيستان ولايت کې د اوبو مديريت لپاره مصرف کړي او د کمالخان بند له جوړېدو سره به د ايران دومره شمېر پانګه ضایع شي.
د ايراني چارواکيو په وينا، د سيستان ولايت د اوسېدونکيو ۳۵ سلنه اوبه له کمالخان بنده تامينېږي.
