د لوګر اطلاعاتو او فرهنګ ریاست چارواکي وایي د دغه ولایت رسنیو او خبریالانو ته د معلوماتو شریکولو لپاره ملکي او نظامي ادارو ته ویاندویان ټاکل شوي دي.
د دغه ولایت اطلاعاتو او فرهنګ رییس رفیعالله صمیم پلعلم کې د خبریالانو یوې غونډې ته وویل، د پخوا په پرتله دغه ولایت کې معلوماتو ته د خبریالانو او رسنیو لاسرسی اسانه شوی او خبریالان کولای شي چې ټولو ملکي او نظامي ادارو څخه پر خپل وخت معلومات ترلاسه کړي.
د سلاموطندار پښتو فېسبوکپاڼه وڅارئ
صمیم زیاته کړه، ولایتي ادارې معلوماتو ته د ښه لاسرسي لپاره ملکي او نظامي ادارو ته ویاندویان ټاکلي او د پخوا په پرتله د خبریالانو او رسنیو ستونزې راکمې شوې دي.
د نوموړي په وینا، د لوګر اطلاعاتو او فرهنګ ریاست هڅه کوي چې د ولایت په کچه د ملي او محلي رسنیو خبریالانو او دولتي ویاندویانو ته د ظرفیت لوړونې پروګرامونه جوړ کړي.
د دغه ولایت خبریالان وایي، لاهم اړتیا شته چې د ځينو ادارو مطبوعاتي مسوولانو ته د ظرفیت لوړونې پروګرامونه جوړ شي.