د افغانستان د غالیو تولیدونکو او صادرونکو ټولنه وايي چې روان کال کې هېواد کې د غالیو تولید زیات شوی، خو په وینا یې، نړیوال بازار کې د بل هېواد په نوم خرڅېږي.
د یادې ټولنې مسوولان زیاتوي چې سږکال د غالیو په تولید کې ۲۵سلنه زیاتوالی راغلی دی. دغه ټولنه همداراز وايي، نړیوال بازار کې د افغانستان نشتون لامل شوی چې د هېواد تولید شوې غالۍ د نورو هېوادونو په نوم نړیوالو بازارونو کې پلور ته وړاندې شي.
د افغانستان د غالیو تولیدونکو او صادرونکو ټولنې مرستیال نوراحمد نوري وویل: «افغانستان کې د غالیو تولید کچه ۲۵سلنه زیاته شوې او غالۍ لومړی لاس نه پلورل کېږي او نړیوال بازار کې ګډون نشو کولای.»
په ورته مهال د اقتصاد وزارت مسلکي مرستیال عبدالطیف نظري وايي چې افغانستان کې د غالیو اوبدلو صنعت ودې او ملاتړ لپاره باید هېواد ته د غالیو د وارداتو مخه ونیول شي.
نوموړي وویل: «که موږ د غالیو له صنعت او دې برخه کې له پانګهاچوونې ملاتړ ونهکړو، دغه صنعت به راتلونکو کلونو کې له رکود سره مخ شي.»
بلخوا د صنعت او سوداګرۍ وزارت مسوولان وايي چې د یادې ټولنې ستونزو ته به رسېدنه وکړي.
د صنعت او سوداګرۍ وزارت مرستیال قدرتالله جلال وویل: «موږ هڅه کوو چې ګمرکي تعرفې کمې کړو او له خلکو غواړو چې له کورنیو تولیداتو استفاده وکړو او همداراز د غالیو تولیدونکو او صادرونکو ټولنې ستونزو ته به رسېدنه وکړو.»
سلاموطندار پر ټویټر هم وڅارئ
د صنعت او سوداګرۍ وزارت د معلوماتو پر بنسټ، په روان کال کې یو میلیونه کسان د غالیو اوبدلو برخه کې پر کار بوخت وو چې دې موده کې یې ۸۰۰زره متر غالۍ اوبدلې دي.